«Ադեկվատ» հասարակական կազմակերպության ղեկավար Արթուր Դանիելյանն իր ֆեյսբուքյան ուղիղ եթերով տեղեկացրել է այն մասին, որ իրենց տղաներից երկու հոգու տուն ուղևորվելիս ոստիկանները ձերբակալել են և տարել ոստիկանության Երևան քաղաքի Կենտրոնի բաժին:
Նա նշել է նաև, որ արդեն իսկ ինքն ուղևորվում է ոստիկանական բաժանմունք` տեղեկանալու համար, թե ինչ պատճառով են ձերբակալել տղաներին:
168.am-ը փորձել է մանրամասներ ճշտել Արթուր Դանիելյանից:
«Երբ մեր այսօրվա բոլոր միջոցառումներն ավարտել էինք, այդ թվում՝ երթը, ու պատրաստվում էինք արդեն բոլորս տուն գնալ, տեղեկացանք, որ տղաներից երկու հոգու ոստիկանությունը ձերբակալել է` կասկածելով ահաբեկչության մեջ: Եղել է ահազանգ, որ այդ մարդիկ ինչ-որ մեկին ահաբեկել են»,- ասել է «Ադեկվատ» Հ/Կ ղեկավարը:
Ավելի ուշ ձերբակալվել է նաև Արթուր Դանիելյանը, ով արդեն հասել էր ոստիկանական բաժին ու փորձում էր մանրամասներ ճշտել տղաների ձերբակալությունից:
Արթուր Դանիելյանն ասել է, որ հաղորդում ներկայացնող քաղաքացին նշել է, որ ահաբեկվել է Մաշտոցի պողոտայով ադեկվատցիների քայլերթից, և որ այն իր մեջ սպառնալիք էր պարունակում: