Տեղեկատվության ստուգման կենտրոն-ի հաղորդագրությունը ներկայացնում ենք ստորեւ։
«Ապատեղեկատվություն. Զարեհ Սինանյանի նշանակումը չի հակասում ՀՀ սահմանադրությանը
Մամուլում հրապարակված այն տեղեկությունը, թե Սփյուռքի գործերի հանձնակատարի պաշտոնում Զարեհ Սինանյանին նշանակելով՝ ՀՀ վարչապետ Նիկոլ Փաշինյանը խախտել է սահմանադրությունը, չի համապատասխանում իրականությանը։
Հոդվածում նշված է, որ #ՀՀ Սահմանադրության 148-րդ հոդվածի համաձայն «Կառավարության անդամը պետք է բավարարի պատգամավորին ներկայացվող պահանջները», իսկ 48-րդ հոդվածն ընդգծում է, որ «Ազգային ժողովի պատգամավոր կարող է ընտրվել 25 միայն Հայաստանի Հանրապետության քաղաքացի հանդիսացող, վերջին չորս տարում Հայաստանի Հանրապետությունում մշտապես բնակվող, ընտրական իրավունք ունեցող և հայերենին տիրապետող յուրաքանչյուր ոք»: Իսկ Զարեհ Սինանյանը, լինելով Գլենդելի քաղաքային խորհրդի անդամ և քաղաքապետ, ունեցել է ԱՄՆ քաղաքացիություն ու մշտական բնակություն է հաստատել Միացյալ Նահանգներում։ Հոդվածագիրը եզրակացություն է կատարում, որ Զ. Սինանյանը, լինելով կառավարության անդամ, այդ պաշտոնին նշանակվել է Սահմանադրական կարգի խախտմամբ։
Մինչդեռ Հանրային ծառայության մասին օրենքի 8-րդ հոդվածի 3-րդ կետը սահմանում է, որ Սփյուռքի գործերի գլխավոր հանձնակատարի պաշտոնը համարվում է հայեցողական պաշտոն։ Հետևաբար՝ այս պաշտոնում նշանկված անձը չի հանդիսանում կառավարության անդամ և չպետք է բավարարի պատգամավորին ներկայացվող պահանջները։ Հայեցողական պաշտոնը նշանակովի պաշտոն է, որը զբաղեցնող անձն իրեն վերապահված լիազորությունների շրջանակներում կատարում է իր անմիջական ղեկավարի հանձնարարականները և պատասխանատվություն է կրում այդ հանձնարարականների կատարման համար:
Նույն հոդվածի 3.1 կետը սահմանում է Սփյուռքի գործերի գլխավոր հանձնակատարի չափանիշները, որտեղ նշվում է՝ պաշտոնը կարող է զբաղեցնել բարձրագույն կրթություն ունեցող, 25 տարին լրացած, հայերենին տիրապետող, ինչպես նաև առնվազն երկու օտար լեզվի իմացությամբ անձը:
Հավելենք նաև, որ Սփյուռքի գործերի գլխավոր հանձնակատարը ունի առանձին գրասենյակ, որն ապահովում է #Սփյուռքի գործերի գլխավոր հանձնակատարի ընթացիկ գործունեության իրականացումը»։
