Սահմանադրական դատարանի ընտրված դատավոր Վահե Գրիգորյանը այսօր ԱԺ ամբոնից հայտարարեց, որ մտնելով ՍԴ՝ ստանձնում է ՍԴ նախագահի պաշտոնը:
«Այս երդումը տալու պահից Սահմանադրական դատարանում լինելու է երկու դատավոր, իսկ Սահմանադրական դատարանի սահմանադրական քվորումը պահանջում է առնվազն 5 դատավոր՝ որոշումներ կայացնելու համար: Սահմանադրության 166-րդ և 170-րդ հոդվածների պահանջով՝ ՍԴ-ն կազմված է բացառապես դատավորներից, և որոշումների կայացմանը մասնակցում են բացառապես դատավորները: Մինչդեռ ՍԴ-ն անցած մեկ տարվա ընթացքում իներցիայի ուժով գործել է ՍԴ անդամների կողմից որոշումների կայացման խնդրահարույց պրակտիկայով»,- հայտարարեց նա:
Գրիգորյանն ասաց, որ բոլոր այս հարցերը քննարկման առարկա է դարձնելու իր գործընեկրների հետ:
«Երդում տալուց հետո, Սահմադրական դատարան մուտք գործելիս որպես այս պահի դրությամբ Սահմանադրական դատարանում միակ դատավոր, որովհետև մյուս դատավորը բացակայում է այս օրերին, ես ստանձնելով ՍԴ նախագահի լիազորությունների և պարտականությունների կատարումը՝ ՍԴ անդամների հետ խնդիրը քննարկելուց հետո, նրանց համաձայնությամբ կամ նրան համախոհությամբ կամ համաձայնության բացակայության դեպքում ընդունելի ձևաչափով այդ մասին կտեղեկացնեմ նաև հանրությանը և իշխանության համապատասխան սահմանադրական մարմիններին, որոնք իրավասու են գործընթացում դերակատարություն ունենալ:
Ամեն դեպքում, հաշվի առնելով վերջին օրերի որոշ իրողություններ և հաշվի առնելով, որ ՀՀ քաղաքացիները լիուլի և իրավաչափ շահեր ունեն բարձրագույն դատական ատյանի կազմի սահմանադրականության հարցերում, խստիվ պիտի պահանջեմ, որպեսզի իսպառ բացառվի ՍԴ անդամների կամ ՍԴ աշխատակազմի որևէ ներկայացուցչի դեմ որևէ ոտնձգություն: Իսկ իրենց խաղաղ հավաքների բոլոր դրսևորումները պետք է իրականացվեն խաղաղ հավաքների մասին օրենքի տառին համապատասխան»,- ասաց նա։
