Հայաստանի վարչապետ Նիկոլ Փաշինյանը ենթադրում է, որ Բրյուսելում հոկտեմբերի վերջին նախատեսված հանդիպումը չի կայանալու այն պատճառով, որ Ադրբեջանի նախագահը չի հաստատել իր մասնակցությունը:
«Արմենպրես»-ի հաղորդմամբ՝ Փաշինյանն այս մասին ասաց Ազգային ժողովում կառավարության հետ հարցուպատասխանին՝ անդրադառնալով հարցին՝ այն չեղարկվե՞լ, թե՞ հետաձգվել է:
«Նախատեսված է այդպիսի հանդիպում: Բայց հիմա փաստն այն է, որ հոկտեմբերին դա չի կայանա: Ենթադրում եմ՝ պատճառն այն է, որ Ադրբեջանի նախագահը չի հաստատել իր մասնակցությունն այդ հանդիպմանը: Բայց նաև կան աշխատանքային մանրամասներ, որոնց առնչությամբ մենք առաջիկա օրերին Եվրամիության գործընկերներից կփորձենք պարզաբանումներ ստանալ և հասկանալ հետագա անելիքները»,-ասաց Փաշինյանը:
Թեև Հայաստանը որոշ հարցերի պատասխաններ արդեն ունի, վարչապետը չշտապեց դրանց վերաբերյալ գնահատական հնչեցնել: Հայաստանն այդ հանդիպմանը մասնակցելու պատրաստակամություն է հայտնել:
