Ինտերնետ կապը Հայաստանում խափանումներով է աշխատում, պատճառը,ինչպես հայտնել են կապի օպերատորները, միջազգային կապուղիներում առաջացած խնդիրներն են, կապուղու վթարը։ Աշխատանքներ են տարվում՝ ինտերնետ կապի անխափան աշխատանքն ապահովելու ուղղությամբ։
Այդ մասին հայտարարություն են տարածել «Յուքոմ» և «Վիվա-ՄՏՍ» ընկերությունները։
«Հարգելի´ բաժանորդներ,
տեղեկացնում ենք, որ միջազգային կապուղիներում առկա տեխնիկական խնդիրների պատճառով ցանցի որոշ հատվածներում նկատվել են խափանումներ, որոնք այժմ կարգավորված են: Կարգավորումները որոշ ժամանակ անց ամբողջապես զգալի կլինեն բոլոր բաժանորդների համար:
Հայցում ենք բոլորիդ ներողամտությունը պատճառած անհարմարության համար»,- նշված է «Յուքոմի» հայտարարությունում:
«Մատակարար ընկերության կապուղու վթարի պատճառով առկա է տվյալների փոխանցման ծառայությունների անկայունություն։ Գործի է դրվել ռեզերվային համակարգը։
Մատակարարի կողմից կատարվում են անհրաժեշտ աշխատանքներ՝ վթարը շուտափույթ վերացնելու ուղղությամբ։
Հայցում ենք բաժանորդների ներողամտությունը»,- նշված է «Վիվա-ՄՏՍ» ընկերության տարածած հաղորդագրությունում։
