Ադրբեջանի գլխավոր դատախազ Քյամրան Ալիևը մերձկասպյան երկրների պաշտոնակիցների հետ հանդիպմանը Հայաստանին մեղադրել է «էկոհանցագործությունների» մեջ և պնդել, որ այդ ուղղությամբ «հետաքննություն է» ընթանում, «արդյունքները պատրաստ լինելուն պես դրանք կօգտագործվեն միջազգային դատարաններում»։Այս մասին հայտնում է «Ազատություն»-ը:
«Միջազգային հանրությունը կտեղեկացվի այդ հանցագործությունների իրավական հետևանքների մասին, և կձեռնարկվեն անհրաժեշտ իրավական միջոցներ՝ ազգային և միջազգային օրենսդրությանը համապատասխան», – հայտարարել է Ադրբեջանի գլխավոր դատախազը առանց հավելյալ մանրամասներ նշելու։
Անցած ամիս վարչապետ Նիկոլ Փաշինյանը հայտարարել է, որ Բաքվի հետ բանակցություններում քննարկվել և քննարկվում է Ադրբեջանի դեմ միջազգային ատյաններ ներկայացված գանգատներից հրաժարվելու հարց, միաժամանակ վարչապետը չի հստակեցրել՝ արդյոք Ալիևի վարչակազմը պատրաստ է հրաժարվել Հայաստանի դեմ ներկայացված ու հնարավոր հայցերից։
