ԱԺ կողմից «Հանրակրթության մասին» եւ «Լեզվի մասին» ՀՀ օրենքներում փոփոխություններ եւ լրացումներ կատարելու մասին աղմկահարույց օրինագծերի ընդունման վերաբերյալ մի խումբ հասարակական գործիչներ հանդես են եկել հայտարարությամբ` որակելով տեղի ունեցածը որպես «ամոթալի խայտառակություն»:
Հիշեցնենք, որ օրենքն այսօր ԱԺ-ում ընդունվել է 69 կողմ, 1 դեմ ձայների հարաբերակցությամբ եւ ըստ այդ փոփոխությունների Հայաստանում կբացվեն օտարալեզու դպրոցներ:
«Այդ 69 պատգամավորները իրենց որոշմամբ խախտեցին Հայաստանի երրորդ հանրապետության Անկախության հռչակագրի սկզբունքները և ՀՀ Սահմանադրությունը: Սա ամոթալի խայտառակություն է, ապտակ բոլոր այն հայորդիներին, ովքեր երբևէ պայքարել են Հայաստանի ազատության և անկախության համար:
Վստահ ենք, որ Հայաստանի ազգային արժեքների անդավաճան հետևորդները ամեն ջանք ներդնելու են Հայաստանում օտարալեզու դպրոցների գործունությունը խափանելու համար: Սա տևական պայքար և մաքառում է ենթադրում, այնքան, որքան անհրաժեշտ կլինի խնդիրը կարգավորելու համար»,-նշել են հայտարարության հեղինակները, որի տակ ստորագրել են Լևոն Բարսեղյանը, Ավետիք Իշխանյանը, Սոնա Այվազյանը, Արթուր Սաքունցը եւ Վարուժան Հոկտանյանը:
© Medialab.am
