Ոստիկանություն. «Ժառանգության» պատգամավորները փորձել են բախումներ հրահրել

Ոստիկանություն.  «Ժառանգության» պատգամավորները փորձել են բախումներ հրահրել
Ոստիկանություն. «Ժառանգության» պատգամավորները փորձել են բախումներ հրահրել

«ԱԺ «Ժառանգություն» խմբակցության մի քանի պատգամավորներ նախ հավաքվածներին սադրեցին մոտենալ Կառավարության շենքին, ապա փորձեցին բախումներ հրահրել ոստիկանների հետ, որոնք օրենքով վերապահված լիազորությունների սահմաններում, պահպանում էին հասարակական կարգը»,-առավոտյան Կառավարության շենքի մոտ տեղի ունեցածի վերաբերյալ իր տարբերակն է հրապարակել ՀՀ Ոստիկանությունը:
Հիշեցնենք, որ մարտի 3-ին, առավոտյան ժամը 10.00-ի սահմաններում Կառավարության շենքի մերձակայքում հավաքվել  էին բացօթյա առևտրի արգելքի դեմ բողոքող մի խումբ անձինք, որոնց միացել էին նաեւ ԱԺ «Ժառանգություն» խմբակցության պատգամավորները, որի ժամանակ բախում է տեղի ունեցել: Պատգամավոր Անահիտ Բախշյանը տեղափոխվել է հիվանդանոց, իսկ ընդդիմադիր Վարդգես Գասպարին` ոստիկանական բաժանմունք:

«Ըստ ամենայնի` պատգամավորների խնդիրը ակցիայի խաղաղ ընթացքը շեղելն էր, կրքերը շիկացնելը, բախում հրահրել քաղաքացիների և ոստիկանների միջև: Դա, բարեբախտաբար, նրանց չհաջողվեց, և  հնչեցին վիրավորանքներ ու հայհոյանքներ ինչպես ոստիկանների, այնպես էլ Կառավարության անդամների հասցեին»,-նշված է Ոստիկանության տարածած հաղորդագրության մեջ:

Ըստ հաղորդագրության, ոստիկաններին հաջողվել է վերահաստատել հասարակական կարգը:

© Medialab.am