Հայաստանի նախկին վարչապետ, ընդդիմադիր Հայ ազգային կոնգրեսի տնտեսական հանձնախմբի ղեկավար Հրանտ Բագրատյանը այսօր լրագրողների հետ հանդիպման ժամանակ գնահատելով ներկայիս կառավարության եւ վարչապետի գործունեությունը` հայտարարել է, թե սա «ունիկալ կառավարություն է»:
«Ունիկալ կառավարություն է. խաղաղության պայմաններում կրճատում են տնտեսությունը»,- հայտարարել է նախկին վարչապետը, ով Հայաստանի կառավարությունը ղեկավարել է պատերազմի տարիներին:
Բագրատյանի խոսքով, իշխանությունները խոսում են տնտեսական աճի մասին, մինչդեռ իրականում Հայաստանը գնալով ավելի ու ավելի հետընթաց է ապրում:
Ըստ նրա` եթե 1 շնչին ընկնող ՀՆԱ-ով ՀՀ-ն 89-90-րդ տեղերում էր, ապա Քոչարյանի իշխանության ժամանակ հասավ 110 տեղը, իսկ հիմա` 140-րդ տեղում է:
Նախկին վարչապետը հիշեցրեց, որ ՀՀ-ում գրանցված տնտեսական աճը պետք է համեմատել հարեւան երկրների աճի հետ, ովքեր Հայաստանից մի քանի անգամ ավելի արագ են զարգանում:
Որպես լուծում Բագրատյանն առաջարկեց աշխատանքից ազատել ներկայիս վարչապետ Տիգրան Սարգսյանին:
«Պետք է Տիգրան Սարգսյանին աշխատանքից հանել, Ձեր կոշիկի ձախ թայը հանել, դնել վարչապետ, նորմալ կաշխատի էդ պետությունը»,- հայտարարել է Բագրատյանը` հավելելով, որ ինքն այդ առաջարկն անում է «ամենայն լրջությամբ»:
© Medialab.am
