Հայաստանում Ֆրանսիայի դեսպանատունն արձագանքել է դեսպան Ժոնաթան Լաքոտի հասցեին ֆեյսբուքյան հայկական հատվածում հնչող քննադատություններին, թե իր ֆեյսբուքյան գրառումներով դեսպանը քամահրական վերաբերմունք է ցուցաբերել Հայաստանի առողջապահական համակարգի և ընդհանրապես վիրավորական դիրքորոշում որդեգրել բարեկամ երկրի նկատմամբ։
«Ֆրանսիայի դեսպանը Հայաստանի առողջապահական համակարգի հասցեին որևէ քննադատություն չի հնչեցրել և ցանկություն չունի որևէ բանավեճի մեջ մտնելու: Առաջնահերթությունը Հայաստանում հոսպիտալացված ֆրանսիացիներին աջակցելն է: Ոչ ռեզիդենտ ֆրանսիացիներին Հայաստանի տարածքը լքելու կոչը նպատակ ունի վերջիններիս վարակման դեպքում կանխել լրացուցիչ ծանրաբեռնվածությունը հայկական հիվանդանոցային համակարգի վրա: Դեսպանությունը մշտապես կապի մեջ է Հայաստանի իշխանությունների հետ և շնորհակալություն է հայտնում վերջններիս ցուցաբերած աջակցության համար»,- ասված է «Ազատությանն» այսօր հասեցագրված Ֆրանսիայի դեսպանատան լրատվական ծառայության պատասխանում։
Մարտի 18-ի իր ֆեյսբուքյան գրառմամբ դեսպան Լաքոտը կոչ էր արել Հայաստանում գտնվող ֆրանսիացիներին վերադառնալ Ֆրանսիա։ Օգտատերերեից մեկի հարցին՝ արդյոք ավելի ապահո՞վ է Ֆրանսիայում, դեսպանն արձագանքել է՝ այո, հատկապես ֆրանսիացիների համար, ովքեր Հայաստանում կապեր չունեն, և բժշկական ենթակառուցվածքի պատճառով։ Այնուհետև կցելով «Նորք» ինֆեկցիոն հինվանդանոցը պատկերող լուսանկար՝ Ժոնաթան Լաքոտը գրել է, թե անշուշտ ազատ եք ընտրել «Նորքի» հոսպիտալը։
Մանրամասները ՝ սկզբնաղբյուր կայքում։
