«Արցախցիների քվեն տեղամասերում «անտեր» չենք թողնի»․Դանիել Իոաննիսյան

«Իրազեկ քաղաքացիների միավորում» ՀԿ ծրագրերի համակարգող Դանել Իոաննիսյանը Ֆեյսբուքի իր էջում գրել է․

«Արցախցիների քվեն տեղամասերում «անտեր» չենք թողնի։

Թեև Արցախի Հանրապետությունում ընտրությունների կայացումն իրապես (մեղմ ասած) խնդրահարույց է (այդ թվում՝ «բարեգործություն» չստացած ընտրողների տեղամաս չգնալու վտանգի առումով), սակայն եթե արտակարգ դրություն չհայտարարվի և ընտրություններն այդուհանդերձ կայանան, «Իրազեկ քաղաքացիների միավորման Ստեփանակերտի գրասենյակը» դրանք դիտարկելու է՝ ՀՀ վարչապետի առաջարկի համաձայն ձեռնարկելով հետևյալ միջոցառումները.

1. Չարենցավանից, Վաղարշապատից և, հնարավոր է, որոշ այլ համայնքներից դիտորդներ չեն լինելու:

2. Բոլոր այն դիտորդները, որոնք շփում են ունեցել նույնիսկ թեթև ախտանիշներով անձանց հետ, ևս չեն գալու Արցախ:

3. Առաքելությունում պատասխանատու պաշտոնում ունենք բժիշկ, որը կհամակարգի հակահամաճարակաբանական գործողությունները:

4. Հայաստանից մեկնող բոլոր դիտորդները կորոնավիրուսի թեսթ կհանձնեն (ես արդեն հանձնել եմ):

5. Քվեարկության օրվա առավոտյան տեղամաս մեկնելուց առաջ դիտորդներին ջերմաչափելու ենք:

6. Բոլոր դիտորդները տեղամասերում լինելու են մեր՝ արդեն ձեռք բերված դիմակներով ու ալկոգելով, հստակ հակահամաճարակային հրահանգավորում են ստանալու: Արցախի ԿԸՀ-ն, ի լրումն դրա, բոլոր ընտրողներին տալու է մեկանգամյա գրիչներ, դիմակներ ու ձեռնոցներ:

Հ.Գ. Հարկ է նկատել, որ առ անցած երեքշաբթի ՀՀ-ից ԱՀ օրական մոտ 1000 մարդ էր մտնում՝ առանց բոլոր այդ կանխարգելիչ միջոցառումների ու ստուգումների:

Հ.Հ.Գ. Սենց վիճակում ժողովրդավարական ընտրություններ չեն լինում»: