Նիկոլ Փաշինյանը լրագրողների խնդրանքով մեկնաբանել է yerkir.am-ին Սամվել Ալեքսանյանի ասածները: Տեղեկացնենք, որ Սամվել Ալեքսանյանը հայտարարել է, թե ընտրություններում հաղթելու է, «Փարվանայում» էլ քեֆ է անելու, ու քանի որ Նիկոլ Փաշինյանը լավ է խոսում, նրան էլ թամադա է դնելու:
Հիշեցնենք, որ մայիսի 6-ին կայանալիք խորհրդարանական ընտրություններում «Հայկական ժամանակ» օրաթերթի գլխավոր խմբագիր, Հայ ազգային կոնգրեսի կենտրոնական գրասենյակի անդամ Նիկոլ Փաշինյանը մեծամասնական ընտրակարգով ԱԺ պատգամավորի թեկնածու է առաջադրվել Երեւանի թիվ 7 ընտրատարածքում: Երեւանի 7-րդ ընտրատեղամասում նա պայքարելոու է հայտնի իշխանական օլիգարխ Սամվել Ալեքսանյանի:
«Ես հասկանում եմ թեկուզ մի քանի ժամով իմ ղեկավարության ներքո գտնվելու Սամվել Ալեքսանյանի ցանկությունը, բայց կարծում եմ նա պետք է յոլա գնա Սերժիկ-Սաշիկի, Սամվել Նիկոյանի կլասի մարդկանց ընկերակցությամբ: Ես Սամվել Ալեքսանյանին սպասում եմ հեռուստաբանավեճի սեղանի շուրջ, եւ այդ բանավեճի արդյունքում թող մարդիկ որոշեն, թե ով, ում, որտեղ դրեց»,-պատասխանել է Փաշինյանը:
Ի պատասխան լրագրողի այն հարցին, թե Ալեքսանյանը պնդում է, որ Փաշինյանի հետ «լավ հարաբերություններ» ունի, «Հայկական ժամանակի» գլխավոր խմբագիրը պատասխանել է:
«Ենթադրում եմ, որ նրա հարաբերությունները Սերժի հետ վատացել են ու նրան նոր «կռիշ» է հարկավոր: Ալեքսանյանին խորհուրդ եմ տալիս կարգավորել իր հարաբերությունները Հայաստանի օրենքների հետ, որովհետեւ ինքը գիտի, որ ինձ հետ չի կարող «հարաբերություններ կարգավորել»:
© Medialab.am