«Մանդատը վայր դնելը իր անձնական գործն է: Ես դեմ եմ այն կարծիքին, որ Ռուբեն Հայրապետյանն ինչ-որ անմարդկային, ինչ-որ անտիպ մի հրեշ է: Չէ: Բոլոր մարդիկ էլ մարդ են ի վերջո հոգու խորքում:
Ես չէի ուզենա իր տեղում լինել, դա ինչ-որ սարսափելի տրավմա է իր համար, պարզ է: Նորմալ է: Բայց դա ոչինչ չի լուծում: Այս համակարգն է պետք փոխել, համակարգը»,- այսօր Aravot.am-ի հետ զրույցում դերասան Սերգեյ Դանիելյանն այսպես մեկնաբանեց «Հարսնաքարի» միջադեպից հետո պատգամավոր Ռուբեն Հայրապետյանի հայտարարությունն ու մանդատից հրաժարվելու քայլը: Ավելի վաղ դերասանը թիկնապահներին կոչել էր «դոբերմաններ» ու հիշեցրել նաեւ «Պապլավոկի» հայտնի սպանությունը` զուգարանում: Նրա խոսքերով` «Եթե անգամ Ռուբեն Հայրապետյանը սաղ փողերն էլ բաժանի ժողովրդին, բոբիկ գնա Էջմիածին, մահացածի ընտանիքին 1 մլն դոլար տա, միեւնույն է, ոչ ինքն է հանգստանալու, ոչ էլ մենք: Որովհետեւ չկա Հայրապետյան, կլինի Մայրապետյան, ի՞նչ տարբերություն: Ես կոնկրետ Մայրապետյանին նկատի չունեմ, ուղղակի աման-չաման բառով եմ խաղում: Նույն բանն է, ի՞նչ տարբերություն: Ինչո՞ւ օլիգարխը կամ բարձր պաշտոնյան պետք է ունենան այդ հաստավզերի շքախումբը: Ոստիկանություն կա: Պրոբլե՞մ ունես, ուզում ես պաշտպանվե՞լ` զանգի, փողը տուր, թող գա ոստիկանը, կանգնի քո կողքին: Վերջ: Համ ոստիկանության վարկանիշը կբարձրանա, համ մենք էլ չենք վախենա էդ եզերից, որ նայում ես, չգիտես արդեն` ումի՞ց է պաշտպանվում»:Կարդալ ավելին