Համավարակով պայմանավորված՝ այս տարի առաջին դասարանցիների համար դպրոցական զանգը հնչեց սեպտեմբերի 14-ին։ Բոլոր դպրոցներում անցկացվեցին տոնական միջոցառումներ։
Երևանի Գարեգին Նժդեհի անվան թիվ 161 դպրոցում կազմակերպված միջոցառմանը ներկա էր նաև ոստիկանության հասարակական անվտանգության ապահովման գլխավոր վարչության պետի տեղակալ, ոստիկանության գնդապետ Նելլի Դուրյանը։ Նա շնորհավորեց աշակերտներին, մաղթեց առողջություն և ուսման մեջ հաջողություններ։
Սեպտեմբերի 14-ից մեկնարկեց նաև ոստիկանության «Զգուշացե՛ք, երեխաներ են» կարգախոսով միջոցառումը։
Այսօրվանից սկսած՝ ոստիկանության տարբեր ստորաբաժանումների աշխատակիցներ ծառայություն կիրականացնեն դպրոցների հարակից տարածքներում։ Ճանապարհային ոստիկանները կապահովեն անվտանգ երթևեկություն, պարեկապահակետային ծառայության ոստիկաններն ու տարածքային բաժինների ծառայողները ուսումնական հաստատությունների շրջակայքում կապահովեն հասարակական կարգը, իսկ դպրոցներում երեխաների հետ կաշխատեն դպրոցական տեսուչները։
Ոստիկանները կստուգեն նաև, որ պահպանվեն հակահամաճարակային անվտանգության կանոնները։ Այս մասին տեղեկացնում են Ոստիկանությունից։
