Ինչպես արդեն տեղեկացրել ենք, ԱԺ-ն արտահերթ նիստով քննարկում է գազի վերաբերյալ հայտնի համաձայնագրերը: Նիստի ընթացքում ունեցած իր ելույթում Հայ ազգային Կոնգրես խմբակցության ղեկավար Լեւոն Զուրաբյանը նշեց, որ քննարկվող փաստաթուղթը ոչ մի քննադատության չի դիմանում: Նա հայտարարեց, որ իշխանությունները առաջարկում են հետին թվով օրինականացնել իշխանությունների կողմից իրականացված անօրինական ու դավաճանական գործարքը: «Բանակցությունները տեղի են ունեցել միայն ՀՀ իշխանությունների ուղեղներում, մինչդեռ Ռուսաստանի համար տեղի է ունեցել գների բարձրացում՝ ՀՀ իշխանությունների համաձայնությամբ: Այդ բարձրացումը գաղտնի է պահվել ոչ միայն հասարկութունից,այլեւ՝ ԱԺ-ից»,- նշեց Զուրաբյանը:
Նա հավելեց, որ կատարվածը այլ կերպ, քան պետական դավաճանություն անվանել հնարավոր չէ, ուստի, որեւէ պատգամավոր, ով քվեարկի կողմ, առաջին հերթին իր վրա է վերցնում այս հանցավոր գործարքի ամբողջ պատասխանատվությունը, ինչի վավերացման արդյունքում Գազպրոմը, ըստ էության, դառնում է պետություն Հայաստանի պետության ներսում:
«Սերժ Սարգսյանի պաշտոնանկության իրավաքաղաքական հիմքերին ավելացավ եւս մեկ հիմք եւ պատեհ առիթով մենք այս հարցն անպայման կբարձրացնենք»,- նշեց Զուրաբյանը՝ հավելելով, որ այսօր ավելի իրատեսական է համարում հետեւյալը. ԱԺ առաջիկա նստաշրջանում Կոնգրեսը բարձրացնելու է կառավարության անվստահության հարցը, նա կոչ արեց բոլոր ոչ իշխանական ուժերին միանալ այդ նախաձեռնությանը:
Տեսանյութը դիտեք այստեղ:
Ilur.am
21.12.2013
Զուրաբյան.Սերժ Սարգսյանի պաշտոնանկության իրավաքաղաքական հիմքերին ավելացավ եւս մեկ հիմք
Զուրաբյան.Սերժ Սարգսյանի պաշտոնանկության իրավաքաղաքական հիմքերին ավելացավ եւս մեկ հիմք