Պետական աշխատողների վրա այս օրերին ճնշումներ են գործադրվում՝ կենսաթոշակային պարտադիր կուտակային ֆոնդեր ընտրելու հարցում: Այս մասին այսօրվա ասուլիսում ահազանգեցին «Դեմ եմ» նախաձեռնության անդամները՝ նշելով, որ պետական աշխատողներին պարտադրում են ընտրել այդ ֆոնդերը:
«Եթե պետական համակարգում նկատվում է ֆոնդերի ընտրողների թվի աճ, նշանակում է, որ ճնշումներ կան: Բացի այդ, մենք նման տեղեկություններ տարբեր ձևերով ստանում ենք»,- նշեց նախաձեռնության անդամ Գևորգ Հայրապետյանը՝ հավելելով, որ իրենք պարբերաբար հրապարակելու են այն ընկերությունների անունները, որոնք ճնշումներ են գործադրում աշխատակիցների վրա:
Նախաձեռնության անդամներն օրինակ բերեցին Հայաստանի էլեկտրական ցանցեր ընկերությունում օրերս տեղի ունեցածը, երբ աշխատակիցների աշխատավարձերի 5 տոկոսի չափով պահումներ են արվել:
Նախաձեռնության անդամները ոստիկանության ուշադրությունն են հրավիրում ճնշումների փաստերի վար:
«Դեմ եմ» նախաձեռնությանը միացել են նաև հանրապետության այլ քաղաքներում՝ Վանաձորում, Ալավերդիում և Գյումրիում: Մարզերի բնակչությունը նույնպես պայքարում է կենսաթոշակային պարտադիր բաղադրիչի դեմ:
Հունվարի 24-ին Սահմանադրական դատարանը կասեցրել էր «Կուտակային կենսաթոշակների մասին» օրենքի որոշ դրույթներ:
Դա նշանակում է, որ մինչև մարտի 28-ի ՍԴ նիստը, որի ժամանակ պետք է որոշվի՝ օրենքը հակասահմանադրական է, թե ոչ, մարդիկ կարող են չընտրել պարտադիր կենսաթոշակային ֆոնդեր ու իրենց աշխատավարձերից վճարումներ չկատարել:
© Medialab.am