Անցնող ողջ գիշերը և մինչև հրադադար հայտարարելը մարտերը նույն կերպ ընթացել են և հատկապես թեժ է եղել հարավային ուղղությունը: Ընդհանուր առմամբ, հակառակորդը նույն գործողություններն է փորձել իրականացնել՝ ապահովել իր առաջխաղացում, սական դրանք կասեցվել են հայկական Զինված ուժերի կողմից: Այդ մասին հայկական տեղեկատվական միասնական կենտրոնում հայտարարեց ՊՆ ներկայացուցիչ Արծրուն Հովհաննիսյանը։
Նրա խոսքով, մարտերի ընթացքում հակառակորդը երեկվա և մինչև կեսօրվա դրությամբ տվել է մոտ 200 զոհ, 3 ԱԹՍ, 4 զինտեխնիկա:
Հովհաննիսյանը ներկայացրեց, որ հոկտեմբերի 10-ին մինչև հրադադար հայտարարելու ժամը՝ 12։00-ն, հակառակորդի գործողություններն ավելի սաստկացել են, ուժգնացել են, բայց հայկական ԶՈՒ-ն հետ է մղել բոլոր առաջխաղացումները: «Այս պահի դրությամբ հիմնականում հրադադարը պահպանվում է` չնայած նրան, որ առանձին տեղերում պրովոկացիաներ իրականացվել են, և մեր կողմից պրովոկացիաներին պատասխան տրվել է», -հավելեց Հովհաննիսյանը:
Անդրադառնալով Հադրութում կատարվածին, Հովհաննիսյանը տեղեկացրեց․ «Մինչև հրադադար հայտարարելը Ադրբեջանի ինված ուժերի հետախուզադիվերսիոն ստորաբաժանումներից փոքր խմբեր փորձել են ներթափանցել Հադրութ քաղաք, և այդ ընթացքում` հրադադարից հետո, մենք այդ խմբերին չեզոքացրել ենք: Ընթացել են ոչ մեծ մասշտաբային մարտեր: Այս մասին ՊԲ-ն լրացուցիչ հայտարարեց, և հստակ նշվեց, որ պրովոկացիան կատարվել է մինչև հրադադարը այն հաշվարկով, որ հրադադարը հայտարարելուց հետո որպես փաստ արդեն արձանագրված լինի»:
