Մոսկվան ելնում է նրանից, որ Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիևի և ՌԴ նախագահ Վլադիմիր Պուտինի՝ Լեռնային Ղարաբաղում ռազմական գործողությունների դադարեցման մասին հայտարարությունը կիրագործվի բոլոր ստորագրողների կողմից: «Արմենպրես»–ի հաղորդմամբ, այս մասին RTVI-ին տված հարցազրույցում նշել է ՌԴ ԱԳՆ պաշտոնական ներկայացուցիչ Մարիա Զախարովան:
«Փաստաթուղթն ունի հայտարարության կարգավիճակ: Մենք ելնում ենք նրանից, որ այն կիրագործվի բոլորի նրանց կողմից, ովքեր ստորագրել են, և այդ ստորագրությունները դրված են»,-ասել է նա: Զախարովան կոչ է արել այս փուլում «չքննարկել այդ փաստաթղթի չիրականացման սցենար»:
«Եկեք խոսենք այն մասին, թե ինչ անել, որ այն իրականացվի, իսկ այս ուղղությամբ քիչ բան չի արվում»,-ասել է նա:
Անդրադառնալով խաղաղապահների հարցին՝ Զախարովան նշել է, որ այն քննարկվել է դեռ մեկ ամիս առաջ, այդ թվում՝ հոկտեմբերի 9-10-ը ՌԴ-ի, Հայաստանի և Ադրբեջանի ԱԳ նախարարների հանդիպմանը:
Հայաստանի, Ռուսաստանի և Ադրբեջանի ղեկավարները պատերազմը նոյեմբերի 10-ի ժամը 01.00-ից դադարեցնելու մասին հայտարարություն են ստորագրել:
