Հայաստանում պետական ծրագրով հնարավորություն է ընձեռված առողջապահական համակարգի բոլոր օղակներում՝ ուռուցքաբանական բուժհետազոտություններն ու վիրահատություն անցնել անվճար: «Արմենպրես»-ի հաղորդմամբ՝ այս մասին փետրվարի 4-ի մամուլի ասուլիսին ասաց ՀՀ ԱՆ Վ.Ա.Ֆանարջյանի անվան ուռուցքաբանության ազգային կենտրոնի տնօրեն Նարեկ Մանուկյանը:
«Ուռուցքաբանական հետազոտություններն անվճար անցնելու հնարավորություն է ընձեռված առաջնային օղակում՝ ամբուլատորիայում և պոլիկլինիկայում: Չարորակ ուռուցքի հաստատումից հետո, անվճար վիրահատությունն իրականացվում է ստացիոնար բաժանմունքում՝ մասնավորապես ուռուցքաբանության ազգային կենտրոնում կամ այն բուժհաստատություններում, որտեղ գործում է պետական պատվեր: Ամբողջությամբ անվճար է ճառագայթային բուժումը: Քիմիաթերապիայի պարագայում՝ պետպատվեր ունեցող բուժհաստատություններում ծառայությունն ամբողջությամբ անվճար է, իսկ դեղորայքը, եթե տվյալ բուժկենտրոնում առկա է, ապա համավճարի սկզբունքով է:
Վիրահատություններն ուռուցքաբանության ազգային կենտրոնում ամբողջությամբ անվճար են կատարվում, եթե հիվանդի մոտ արդեն իսկ ախտորոշվել ու հաստատվել է չարորակ ուռուցք»,- մանրամասնեց Մանուկյանը՝ տեղեկացնելով նաև, որ այս տարվա հունվարից մեկնարկել է կրծքագեղձի քաղցկեղի հայտնաբերման սքրինինգային ծրագիր:
«Պիլոտային այս ծրագիրը, որն իրականացվելու է Հայաստանի 3 մարզերում, մեկնարկել է Վանաձոր քաղաքից: Առայսօր այդ հետազոտությունն անցել է 307 կին: Հստակ կարող ենք ասել, որ այդ ծրագրի իրականացումը բերելու է քաղցկեղի վաղ հայտնաբերելիության ու բազմաթիվ կյանքեր փրկելուն»,- ասաց ուռուցքաբանության ազգային կենտրոնի տնօրենը :