www.lragir.am-Ավետիսյանների հարազատները հացադուլ կանեն ՌԴ հյուպատոսարանի առաջ:
Գյումրիի Մյասնիկյան 188 հասցեն այսօր մարդաշատ էր: Սպանված 7 քաղաքացիներ եւ օդում կախված բազմաթիվ ինչուներ, որոնց պատասխանը չունի ոչ ոք: Շատերն էին այսօր եկել Ավետիսյանների տուն՝ այդ ինչուների պատասխանը ստանալու ակնկալիքով, բայց բացարձակ ոչ մի հարցի պատասխան չունեն անգամ տուժողների իրավահաջորդները:
Ողբերգական սպանությունից 40 օր անց հարազատները նույն հարցերն են տալիս՝ ինչու՞ են հանցագործները ընտրել հենց այս՝ ոչնչով աչքի չընկնող, համեստ բնակարանը:
Նրանք համոզված են, որ սպանությունը նա չի կատարել, ում ներկայացնում են:
«Բաց թողեք Պերմյակովին, նա անմեղ է, փնտրեք դրսում գտնվող իրական հանցագործներին: Էդ երեխեն չէր կարող սպանել այս ընտանիքին, անմեղ ընտանիքին: Զինվոր մարդ, պետության ձեռքի մարդ, էդ երեխեն չէր կարող անել: Որպես չուչել բերին քցին երեխուն…»,- անգամ նման հայտարարություն էին այսօր անում Հասմիկ Ավետիսյանի քույրերը:
Նրանք դարձյալ պնդում են, որ տեղի ունեցածը կազմակերպված սպանություն է եղել, որը մեկ հոգի չէր կարող կատարել:
Հարազատները պահանջում են ՀՀ իշխանություններից՝ օր առաջ պատասխանել իրենց հուզող հարցերին, հակառակ պարագայում սպառնում են՝ կգնան ծայրահեղ քայլերի: Նրանք մտադրություն ունեն կազմակերպել բողոքի գործողություններ, հացադուլ անել՝ հենց ՌԴ հյուպատոսարանի առաջ:
«Եթե մեր իշխանություն կոչվածները չեն կարող ոչինչ անել, մենք իմանանք՝ գնանք ռուսներից բան պահանջենք: Ասե՛ք մեզ, մենք ի՞նչ անենք, ո՞վ սպանեց իմ քրոջ մեծ ընտանիքը, ո՞վ մարեց Ավետիսյանների ծուխը, ով սպանեց իմ բալեքին»,-ասում էր Հասմիկ Ավետիսյանի քույրը՝ տիկին Ջուլիետան: Ավելին` սկզբնաղբյուրում