Ոստիկանության պետ Վահե Ղազարյանի շնորհավորական ուղերձը մարտի 8-ի առթիվ

Հեղինակ MediaLab

Ոստիկանության կոլեգիայի անունից և անձամբ շնորհավորում եմ Մարտի 8-ի՝ Գարնան և գեղեցկության տոնի առթիվ:

Սիրելի կանա’յք, այս անգամ ձեր տոնը տխրության շունչ ու սխրանքի խորհուրդ ունի:

Խորին խոնարհումս ու շնորհավորանքս եմ հղում նախ և առաջ մեր զոհված ծառայակիցների մայրերին, կանանց, քույրերին, դստրիկներին:
Ձեր կորուստն անչափելի է, բայց վստահ եղեք, որ միշտ ձեր կողքին ենք և անելու ենք ամեն ինչ ձեր վիշտը գոնե փոքր-ինչ սփոփելու համար:

Շնորհավորում եմ մեր գործընկերուհիների՝ կին-ոստիկանների տոնը:
Դուք տղամարդկանց հավասար կրում եք ծառայության բոլոր դժվարությունները՝ աշխատանքը լիարժեք զուգորդելով ընտանիքի մոր արժանապատիվ առաքելության հետ:

Շնորհավորում եմ մեր գործընկերների մայրերին, քույրերին, կանանց, դուստրերին:
Թող ձեր սպասումը ծառայությունից վերադարձող սիրելիներին միշտ պսակվի հանդիպման երջանկությամբ:

Շնորհավորում եմ մեր կին-վետերաններին, որոնք պատվարժան և ուսանելի ճանապարհ են անցել և այսօր իրենց փորձն են փոխանցում երիտասարդներին:
Շնորհավորանքներս եմ հղում Արցախի Հանրապետության մեր գործընկերուհիներին, մաղթում խաղաղ ծառայություն, ուժ ու հավատ, որ ապագան մերն է լինելու:

Շնորհավորում եմ բոլոր կանանց: Խաղաղություն ձեր ընտանիքներին: Երջանկություն ձեզ, սիրելինե՜ր: