Ստեփանակերտի քաղաքապետարանը նախաձեռնել է կառուցել Եղբայրական գերեզմանոցի նոր հատվածը, որտեղ ննջում են 44-օրյա պատերազմի հետևանքով անմահացած հերոսները:
«Քաղաքային իշխանությունների այս որոշումը պայմանավորված է մեր սուրբ նահատակների ընտանիքներին ֆինանսական ծանրաբեռնվածությունից ազատելու ցանկությամբ: Բացի այդ, յուրաքանչյուրիս պարտքն է փայփայել մեր տղաների անմար հիշատակը և նեցուկ կանգնել նրանց հարազատներին: Նաև տեղեկացնում ենք, որ շինարարությունն ընթանալու է փուլային տարբերակով և անպայման քննարկվելու ու հաշվի են առնվելու զոհվածների ընտանիքների նկատառումները՝ տապանաքարերի, նկարների և այլ նրբությունների վերաբերյալ»։ Այս մասին տեղեկացնում են Ստեփանակերտի քաղաքապետարանից՝ ակնկալելով քաղաքի ամբողջ բնակչության աջակցությունը այդ նվիրական ծրագիրը կյանքի կոչելու գործում:
