Երևանի ավագանին մարտի 16-ի նիստում որոշեց «Հակատուբերկուլյոզային դիսպանսեր» ՍՊԸ-ին 2021 թվականի բյուջեի ֆոնդային մասի պահուստային ֆոնդից հատկացնել 9 մլն 700 հազար դրամ՝ անշարժ գույքի ձեռքբերման նպատակով:
«Երևան քաղաքի 2021 թվականի բյուջեի ֆոնդային մասի պահուստային ֆոնդից դիսպանսերին հատկացվելու է 313 հազար 400 դրամ՝ հաշվեկշռում հաշվառված շարժական գույքի ձեռքբերման նպատակով»,- «Արմենպրես»-ի հաղորդմամբ՝ այս մասին ասաց զեկուցող՝ Երևանի փոխքաղաքապետ Սերգեյ Ներսիսյանը:
Ավագանու «Բարգավաճ Հայաստան» խմբակցության անդամ Միքայել Մանրիկյանը նշեց, որ դեռ 2020 թվականին դիսպանսերը լուծարվել էր և ցանկացավ իմանալ, թե ինչ պլաններ կան այդ կառույցի վերաբերյալ: «Ինչ պլաններ կան այդ բուժհաստատության հետ կապված, որ գույքի գնման նպատակով գումար ենք տրամադրում: Ինձ համար անակնկալ էր այս նախագիծը»,- ասաց Մանրիկյանը:
Երևանի փոխքաղաքապետ Սերգեյ Ներսիսյանն էլ շեշտեց, որ սույն որոշմամբ գումարը հատկացվում է շենք-շինության ձեռքբերման մասով, որն իրականացվում է «Հարկային օրենսգրքի» դրույթներին համապատասխան:
Ներսիսյանն ընդգծեց, որ լուծարային գործընթացի շրջանակում տվյալ գույքը պետք է հետ վերադարձնել Երևան համայնքի բալանսին: «Իրավական տեսանկյունից վերադարձը դիտարկվում է որպես օտարում, ինչի արդյունքում գոյանում են հարկային պարտավորություններ, որի հետևանքով մենք կիրառել ենք 99 տոկոս զեղչ»,- նշեց Երևանի քաղաքապետի տեղակալը:
Երևանի քաղաքապետ Հայկ Մարությանն արձագանքեց և ասաց, որ շենքը չեն գնում, գույքը այդ հիմնարկից անցնում է քաղաքապետարանի բալանսին:
Ֆինանսավարկային տնտեսական հարցերի մշտական հանձնաժողովը հարցին տվել է դրական եզրակացություն:
Որոշումն ընդունվեց 37 կողմ, 0 դեմ և 1 ձեռնպահ ձայներով:
