COVID-ի դեմ պատերազմը դեռ չի ավարտվել. Արկադի խաչատրյանը քաղաքացիներին զգոնության կոչ է արել

Ազգային ժողովում COVID-ի դեմ պայքարի արդյունավետությունն ուսումնասիրող քննիչ հանձնաժողովի նախագահ, «Լուսավոր Հայաստանի» պատգամավոր Արկադի Խաչատրյանը զգոնության կոչ է անում.

«Զգոնության կոչ
Սիրելի՛ հայրենակիցներ

ՀՀ առողջապահության նախարարության տրամադրած տեղեկատվության համաձայն՝ այսօր ՀՀ-ում արձանագրվել է նոր կորոնավիրուսով (COVID 19) վարակման 1024 նոր դեպք, ընդհանուր վարակվածների քանակը արդեն կազմում է 9830 մարդ, հիվանդանոցներում բուժվում է շուրջ 1500 մարդ:
Հաշվի առնելով այն հանգամանքը, որ COVID-վ հիվանդների մահճակալային ֆոնդը սահմանափակ է, համավարակի տարածման նման տեմպերի շարունակական աճի դեպքում մոտ ապագայում կարող ենք կրկին ունենալ հիվանդներ ընդունելու և պատշաճ բուժծառայություններ մատուցելու առողջապահական համակարգի կարողությունների հետ կապված խնդիրներ:

Վերոհիշյալից ելնելով՝ ես զգոնության կոչով դիմում եմ մեր հայրենակիցներին՝ պատասխանատու վարքագիծ դրսևորելու, դիմակներ կրելու, սոցիալական հեռավորություն և կարանտինային այլ կանոնները պահպանելու համար՝ եթե ոչ ինքներս մեր, այլ գոնե հանուն մեր հարազատների, ծնողների, պապիկների և տատիկների, խրոնիկ հիվանդություններ ունեցող անձանց: COVID-ի դեմ պատերազմը դեռ չի ավարտվել: Անցած տարի մենք ունեցել ենք սարսափելի քանակությամբ մարդկային կորուստներ, և չենք կարող մեզ թույլ տալ կրկին ունենալու նման կորուստներ:

Միևնույն ժամանակ, ես կոչով դիմում եմ ՀՀ կառավարությանը՝ անհապաղ միջոցներ ձեռնարկելու՝ հանրության զգոնությունը և վտանգի գիտակցումը բարձրացնելու ուղղությամբ: Հանրային հաղորդակցման միասնական ռազմավարության ներքո՝ անհրաժեշտ է անհապաղ և պարբերաբար զգոնության կոչեր հղել հանրությանը՝ պատասխանատու պաշտոնատար անձանց և մասնագետների կողմից: Չափազանց մեծ է ԶԼՄ-երի դերը այս հարցում: Անհրաժեշտ է վերսկսել լայնածավալ բացատրական աշխատանքների իրականացումը պատկան մարմինների, այդ թվում Ոստիկանության կողմից, ապահովելով մարդու հիմնարար իրավունքների և ազատությունների ազատ իրացումը երկրում: Մեզնից յուրաքանչյուրի գիտակված, պատասխանատու և կարգապահ վարքագիծը շատ ավելի կարևոր է, քան ինքնին վարչական պատասխանատվության միջոցների կիրառումը: Այս ամենի անհապաղ իրականացումը շատ կարևոր է՝ իրավիճակը կայունացնելու համար՝ առանց պարտադրված սահմանափակումներ մտցնելու և տնտեսական գին վճարելու անհրաժեշտության:

Հաշվի առնելով այն հանգամանքը, որ համավարակի վերջնական հաղթահարման հիմնական միջոցը ազգաբնակչության պատվաստումն է, ուզում եմ անդրադառնալ նաև այս թեմային:

ՀՀ առողջապահության նախարարության տրամադրած տեղեկատվության համաձայն՝ առ այսօր, որպես նվիրատվություն ՀՀ-ն ՌԴ-ից ստացել է 2000-ց քիչ ավելի պատվաստանյութ, գնման ընթացքումէ շուրջ 15 000 ռուսական արտադրության պատվաստանյութ, որն ակնկալվում է ստանալ առաջիկա շաբաթների ընթացքում, ինչպես նաև ընթացքում է անգլիական արտադրության պատվաստանյութի գնումը:

Ներկայումս հանրապետությունում խոցելի խմբերում գտնվող մարդկանց քանակը կազմում է շուրջ 600 000 մարդ (ազգաբնակչության շուրջ 20%-), այդ թվում՝ տարեցներ, խրոնիկ հիվանդություններ ունեցող անձինք և այլն:
Նշված խոցելի խմբերում գտնվող մարդկանց պատվաստման ակնհայտ հրատապությունից և առաջնահերթությունից ելնելով՝ ես կոչ եմ անում Կառավարությանը անհապաղ բազմապատկել ջանքերը՝ հնարավորինս սեղմ ժամկետներում նոր և անհամեմատ մեծ խմբաքանակով պատվաստանյութ ձեռք բերելու և տարեցներին, խրոնիկ հիվանդություններ ունեցող անձանց, բուժաշխատողներին լայնածավալ պատվաստման գործընթաց սկսելու ուղղությամբ:

Առողջ եղեք»։