ԱՄՆ-ում շարունակում են մոլեգնել անտառային հրդեհները.Ամերիկայի ձայնը

Ալյասկայից մինչեւ Վայոմինգ ընկած հատվածում վերջին օրերի ընթացքում բռնկվել է անտառային մոտ 60 հրդեհ: Հրդեհների մեծ մասը շարունակվում է Արիզոնայում, Այդահոյում ու Մոնթանայում:

Այս մասին գրում է «Ամերիկայի ձայն»-ը։

ԱՄՆ-ի արեւմտյան նահանգներում հրդեհները բռնկվել են մի քանի շաբաթ չափազանց շոգ եղանակի պատճառով: Այս հատվածներում սկսվել է երաշտ:

Չափից շատ շոգ եղանակը սակայն, ըստ Եղանակի տեսության ազգային ծառայության, երեքշաբթի օրվանից կարող է մեղմվել: Սակայն բարձր ջերմության ալիքը շարժվում է դեպի Կալիֆոռնիայի որոշ անապատներ: Կայծակների արդյունքում սկսված հրդեհների պատճառով տրվել է Նեւադայի որոշ բնակավայրերից ավելի քան երեք հազար բնակիչների տարհանելու հրահանգ:

Այս պահի դրությամբ այստեղ հրդեհը ծածկել է 365քառ. կիլոմետր: Սակայն ԱՄՆ-ում ամենամեծ հրդեհը տարածվել է Կալիֆոռնիայի ու Օրեգոնի սահմանին, որի արդյունքում ավելի քան երկու հազար տուն հայտնվել է հրկիզվելու վտանգի տակ:

Նահանգի որոշ մարզերում ուժի մեջ է մտել չհեռանալու դեպքում կալանավորվելու մասին հրամանը: Հրդեհների արդյունքում մեծապես խաթարվել է էլեկտրասնուցման երեք ուղի, որոնք մատակարարում են մինչեւ 5500 մեգավատտ էլեկտրաէներգիա Կալիֆոռնիայի տարբեր հատվածների:

Կայծակների ու փոթորիկների արդյունքում Վաշինգտոն նահանգում անտառային հրդեհներն այրել են 223 քառ. կիլոմետր տարածք: Գիտնականներն ասում են, որ մարդու կողմից հարուցված կլիմայական փոփոխությունն է այս հրդեհների բռնկման ու արագ տարածման գլխավոր պատճառը: