Վրաստանում կորոնավիրուսից մահացածների 99,7% -ը պատվաստված չի եղել

Aliq.ge – Հիվանդությունների վերահսկման և հանրային առողջության ազգային կենտրոնի ղեկավար Ամիրան Գամկղրելիձեի խոսքով՝ Վրաստանում կորոնավիրուսից մահացածների 99,7% -ը պատվաստված չի եղել: Այս մասին Գամկղրելիձեն հայտարարել է միջգերատեսչական համակարգող խորհրդի նիստից հետո:

Գամկղրելիձեն նշել է, որ պատվաստված անձանց մոտ վիրուսի տարածման մակարդակը ցածր է:

«Ցավոք, այսօր ունենք 34 մահ: Մեկ հիմնական ուղերձ, որը ես կցանկանայի անել. երեկ այս տարվա մահերի ընդհանուր թվի վերլուծություն է իրականացվել, և նրանց 99,7% -ը, ցավոք, պատվաստած չի եղել:

Մյուս կողմից, վերլուծվել են նաև պատվաստված բնակչության վարակման դեպքերը, այն է` կրկնակի պատվաստվածների 0.3% -ը և մեկ անգամ պատվաստվածների 0.9% -ը: Պատվաստված 1000 մարդուց մեկը կարող է մահանալ, մինչդեռ 1000 չպատվաստվածներից մահանում է 15 մարդ»,- ասել է Գամկղրելիձեն՝ հավելելով, որ առավոտվա տվյալներով, Վրաստանում ընդհանուր հաշվով պատվաստվել է 523 հազար մարդ, որից 165 հազարը ստացել է ամբողջական դեղաչափը, ինչը կազմում է չափահաս բնակչության 5,8% -ը:

Վրաստանում կորոնավիրուսի դեմ պատվաստումները սկսվել են մարտի 15 -ին ՝ աստիճանաբար ընդգրկելով բնակչության նոր խմբեր: Հուլիսի 5-ից մեկնարկել է մասսայական պատվաստումը: Միջին հաշվով` երկրում օրական կատարվում է 15-17 հազար ներարկում:

Ներկայումս Pfizer- ով պատվաստումը թույլատրվում է 16 տարեկանից բարձր անձանց: 45 տարեկանից բարձր մարդիկ կարող են ընտրել AstraZeneca, իսկ 18 -ից բարձրերը` Sinopharm կամ Sinovac: