«Հիմա պետք է լինենք կամ խոհեմ, կամ՝ ոչ, այլ ընտրություն չկա»:
Այսօր՝ ԸՕ-ի փոփոխությունների հարցով ԱԺ արտահերթ նիստի ժամանակ հայտարարել է ԲՀԿ խմբակցության պատգամավոր Նաիրա Զոհրաբյանը՝ նշելով, որ երկրում ստեղծված է ոչ ստանդարտ քաղաքական իրավիճակ. դեկտեմբերին պետք է անցկացվեն արտահերթ խորհրդարանական ընտրություններ:
«Կամ մենք գնում ենք նոր Ընտրական օրենսգրքով, որն էականորեն բարելավում է ընտրական ընթացակարգերը, կամ դուք գնում եք սաբոտաժի ճանապարհով և ընտրությունների գնալու ենք հին Ընտրական օրենսգրքով: Ես հորդորում եմ մյուս խմբակցություններին գնալ խոհեմության ճանապարհով, գնալ քաղաքական կոնսենսուսի»,-ասել է Զոհրաբյանը՝ կոչ անելով գնալ քաղաքական բարեկամության ճանապարհով, թույլ տալ, որ Ընտրական օրենսգիրքն ընդունվի, որ առաջիկա ընտրություններն անցկացվեն շատ ավելի քաղաքական, բարելավված օրենսգրքով, քան նրանով, որն ապաքաղաքականացրեց նախորդ խորհրդարանական ընտրությունները:
Ելույթ ունեցող ԲՀԿ խմբակցության այլ պատգամավորներ եւս հայտարարեցին, որ իրենց խմբակցությունը կողմ է քվեարկելու կառավարության բերած Ընտրական օրենսգրքի փոփոխությունների նախագծին:
ՀՀԿ-ական պատգամավորները, սակայն, նիստերի դահլիճ չեն ներկայանում: Որպեսզի նախագիծն ընդունվի, անհրաժեշտ է առնվազն 63 պատգամավորի կողմ քվե: Նիստին ներկա են, սակայն, միայն 53 պատգամավորներ: