Դատարանը մերժել է «Սուրբ Գրիգոր Լուսավորիչ» բժշկական կենտրոնի նախկին տնօրեն, Սերժ Սարգսյանի խնամի Արա Մինասյանի նկատմամբ կալանքը որպես խափանման միջոց կիրառելու քննիչի միջնորդությունը։
Այդ մասին «Ազատության»-ը փոխանցել է Մինասյանի փաստաբան Տիգրան Ղազարյանը։
Փաստաբանն ասել է, որ քննիչին ներկայացրած միջնորդությունը մերժվել է՝ անհիմն լինելու պատճառաբանությամբ։
«Դատական ակտի եզրափակիչ մասն է հրապարակվել, այսինքն՝ քննիչի միջնորդությունը մերժել՝ անհիմն լինելու պատճառաբանությամբ։ Դատական ակտը դեռևս չենք ստացել, ակնկալվում է, որ դատական ակտը կստանանք այսօր, այս պահի դրությամբ չունենք դատական ակտը, որպեսզի բովանդակային տեսանկյունից ուսումնասիրենք», – ասել է Ղազարյանը։
Հիշեցնենք, որ նոյեմբերի 2-ին Արա Մինասյանին մեղադրանք էր առաջադրվել՝ 2016 թվականից մինչև 2017 թվականի սեպտեմբերի 30-ն ընկած ժամանակահատվածում, «Սուրբ Գրիգոր Լուսավորիչ» ԲԿ մի շարք աշխատակիցների հանցակցությամբ, փաստաթղթեր կեղծելու և կեղծ փաստաթղթեր օգտագործելու միջոցով խարդախություն կատարելու համար:
Նրա հանդեպ հայտարարվել էր հետախուզում: