Ալիևը հերքել է Բաքվին ուղղված Թեհրանի պաշտոնական մեղադրանքներն ու ապացույցներ պահանջել.Factor

Ադրբեջանի նախագահ Իլհամ Ալիևը հայտարարել է, թե չի ընդունում Իրանի պաշտոնյաների մեղադրանքները իրանա-ադրբեջանական սահմանին Իսրայելի ներկայության մասին։

Այս մասին հաղորդում են ադրբեջանական լրատվամիջոցները։ «Ցավոք, Իրանի պաշտոնատար անձինք սկսել են մեր դեմ անհիմն մեղադրանքներ հնչեցնել, թե Ադրբեջանը, իբր, Իսրայելին բերել է այս տարածաշրջան։ Թող աչքերը բացեն, որտե՞ղ են այստեղ Իսրայել տեսնում։

Այստեղ ոչ ոք չկա, այստեղ նույնիսկ որևէ շենք չկա»,- հայտարարել է Ալիևը Արցախի գրավյալ Ջրական այցելության ժամանակ։ Ադրբեջանի նախագահն ասել է, որ հերքում է Թեհրանի այդ հայտարարությունները և պահանջում է ապացույցներ ներկայացնել։

«Կա՞ն ապացույցներ։ Ո՛չ։ Եթե ապացույցներ չկա, ապա յուրաքանչյուրը պետք է պատասխանատվություն կրի նրա համար, ինչի մասին խոսում է։ Մենք բարի մտադրություններ ունենք, բայց դա չի նշանակում, որ ընդունելու ենք մեր դեմ անհիմն մեղադրանքները։ Ես սա ասում եմ այստեղ՝ Ջաբրայիլում, Արաքսի ափին, Ադրբեջանի ժողովրդին ու ամբողջ աշխարհին՝ մեր դեմ անհիմն մեղադրանքներն անպատասխան չեն մնա»,- ասել է Իլհամ Ալիևը։

Հիշեցնենք, որ Իրանի ԱԳ նախարար Հոսեյն Ամիր Աբդուլլահիանը ավելի վաղ հայտարարել էր, որ Թեհրանը չի հանդուրժի «սիոնիստական ռեժիմի ներկայությունը իր սահմաններին ու նրա սադրիչ գործողությունները», ինչպես նաև տարածաշրջանում աշխարհաքաղաքական ու սահմանային փոփոխությունները։ Իրանի ԱԳ նախարարը նաև ասել է, որ իրենց դժգոհությունները դիվանագիտական խողովակներով փոխանցել են Ադրբեջանին։

Այս մասին հայտնում է factor.am-ը: