Համաշխարհային բանկը շահերի բախում չի տեսնում այն հանգամանքում, որ Գյուղատնտեսության զարգացման հիմնադրամը փոխվարչապետ Տիգրան Ավինյանի հիմնադրած «Իրիգեյթ» ՍՊԸ-ին 35 հազար ԱՄՆ դոլար դրամաշնորհ է տրամադրել այն ժամանակ, երբ Տիգրան Ավինյանը ստանձնել էր փոխվարչապետի պաշտոնը:
Այս մասին Hetq.am-ին տեղեկացրել են Համաշխարհային բանկի երևանյան գրասենյակից, որին նոյեմբերի 1-ին գրավոր հարցում էր ուղարկել կայքը:
ՀԲ-ի երևանյան գրասենյակի տնօրեն Սիլվի Բոսութղոյին Hetq.am-ը հարցրել էր. «Համաշխարհային բանկը՝ որպես վերահսկող, խնդիր չի՞ տեսնում այն բանում, որ փոխվարչապետ Տիգրան Ավինյանի հիմնած ընկերության հայտը բավարարվել է այն ժամանակ, երբ վերջինս արդեն զբաղեցնում էր փոխվարչապետի պաշտոնը»:
ՀԲ-ի պատասխանը այսպիսին էր. «Գյուղատնտեսության զարգացման հիմնադրամը (ԳԶՀ) Համաշխարհային բանկի (ՀԲ) կողմից ֆինանսավորվող Գյուղատնտեսական ռեսուրսների կառավարման և մրցունակության երկրորդ ծրագրի իրականացնող կառույցն է: Ծրագրի շրջանակներում իրականացվող Արժեշղթայի զարգացման բաղադրիչի գործընթացը կատարվում է ըստ այս բաղադրիչի համար մշակված և ՀԲ-ի կողմից հավանության արժանացած Գործառնական ձեռնարկում (ԳՁ) նկարագրված՝ ներառյալ շահերի բախմանը վերաբերվող բաժինը, ընթացակարգերի: Այդ ընթացակարգերի համաձայն, որոնց ծրագրի մեր գործընկերնեը հետևել են՝ ենթածրագրերի ֆինանսավորում ստանալու ընտրությունը կատարվել է ԳՁ-ում նկարագրված երեք փուլով»:
«Հետք»-ը հոկտեմբերի 29-ին գրել էր, որ փոխվարչապետ Տիգրան Ավինյանի հիմնադրած «Իրիգեյթ» ՍՊԸ-ն չրի արտադրությունը զարգացնելու համար այս տարի մոտ 35 հազար ԱՄՆ դոլար դրամաշնորհ է ստացել Գյուղատնտեսության զարգացման հիմնադրամից: Hetq.am-ի հրապարակումից հետո Տիգրան Ավինյանի մամուլի քարտուղարը պարզաբանել էր, որ դրամաշնորհների մրցույթի գործընթացը համապատասխանում է Համաշխարհային բանկի կողմից սահմանված ընթացակարգերին: Վարչապետի պաշտոնակատար Նիկոլ Փաշինյանն էլ հանձնարարել էր ուսումնասիրել «Հետք»-ի հրապարակումը:
