Համայն Վրաստանի կաթողիկոս-պատրիարք Իլիա II-ը երկրի երրորդ նախագահ, կալանավորված ու հացադուլ հայտարարած Միխեիլ Սաակաշվիլիին հացադուլը դադարեցնելու կոչ է արել, գրում է Aliq.ge-ն։
Պատրիարքի քարտուղար Միխեիլ Բոտկովելն այցելել է Ռուսթավիի բանտում գտնվող Սաակաշվիլին ու փոխանցել պատրիարքի ուղերձը։
«Նամակի բովանդակությունը վերաբերում է նախկին նախագահի հացադուլին», — ասել է Բոտկովելը։
Լրագրողների այն հարցին, թե արդյոք պատրիարքը դիմելու է ներկայիս նախագահ Սալոմե Զուրաբիշվիլիին՝ Միխեիլ Սաակաշվիլիին ներում շնորհելու խնդրանքով, նա պատասխանել է, որ չի կարող դա անել, քանզի դրա իրավունքը միայն երկրի նախագահն ունի:
Վրաստանի հինգերորդ նախագահ Սալոմե Զուրաբիշվիլին ներում չի շնորհել Վրաստանի երրորդ նախագահ Միխեիլ Սաակաշվիլիին, ավելին նա արտակարգ ճեպազրույցում ասել է, որ չի վերադառնա այդ հարցին։
Հիշեցնենք, որ Վրաստանի երրորդ նախագահ Միխայիլ Սահակաշվիլին հոկտեմբերի 1-ից կալանավորված է, գտնվում է Ռուսթավի քրեակատարողական հիմնարկում։ Այդ ժամանակից ի վեր նա հացադուլ է հայտարարել։ Թե՛ փաստաբանները, թե՛ անձնական բժիշկը նշում են, որ Սաակաշվիլիի վիճակը գնալով ավելի է վատանում հացադուլի պատճառով։ Նրանց խնդրանքը Միխայիլ Սահակաշվիլիին քաղաքացիական կլինիկա տեղափոխելն է։ Սակայն կառավարությունը համաձայն չէ և հայտարարում է, որ անհրաժեշտության դեպքում նրան պատշաճ բուժօգնություն կցուցաբերեն Գլդանի քրեակատարողական հիմնարկի կլինիկայում։
