Այսօր Ֆրանսիայի հրապարակում տեղի ունեցած ասուլիսում «Հայաստան» խմբակցության պատգամավոր, դիմադրության շարժման ներկայացուցիչ Իշխան Սաղաթելյանը հայտարարեց, որ գործող իշխանությունները խաբել են հանրությանը բոլոր ոլորտներում: Նաև ընդգծեց, որ իրենք այդպես չեն վարվի:
«Ես մի անգամ ասել եմ. այն բոլոր խոստումները, որ այս իշխանությունները հանրությանը տվել են 2018 թվականին ու չեն իրականացրել, մենք նաև այդ խոստումներն ենք իրականացնելու: Այո, հայ մարդը Հայաստանում պետք է ապրի բարեկեցիկ, պետք է ապրի արժանապատիվ, Հայաստանում պետք է լինեն ներդրումներ և դրա հնարավորությունները կան: Առաջին խնդիրը, որ պետք է լուծենք, ատելության, պառակտվածության, թշնամանքի մթնոլորտի վերացումն է: Պետք է համախմբենք ողջ հայ ժողովրդի ներուժը: Լուծումները հեշտ չեն լինելու:
Մենք որևէ մեկին կախարդական փայտիկ չենք խոստանում, ինչպես իրենք էին խոստանում, մենք հայ գյուղացուն չենք խոստանում, որ մենք գանք իշխանության ձեր կովերի կաթնատվությունը կբարձրանա, ոնց իրենք էին խոստանում: Բայց մենք հայ գյուղացուն ասելու ենք, որ քո կողքը կանգնելու ենք», -հայտարարել է Սաղաթելյանը:
Նրա խոսքով, մարդը միայնակ է մնացել իր խնդիրներով, պետությունը քաղաքացու կողքին չէ: