Գյուղատնտեսության զարգացման համար առանձնացվել է 7 քայլ, որոնք այսօր Սյունիքի մարզում անցկացվող «Իմ քայլը հանուն Սյունիքի մարզի» համաժողովի ժամանակ ներկայացրեց գյուղատնտեսության փոխնախարար Արտակ Քամալյանը:
Առաջինն այն է, որ կառավարությունը նպատակ ունի 10 տարի հետո կամ ավելի շուտ ապահովել, որպեսզի յուրաքանչյուր գյուղացիական տնտեսություն ունենա տարեկան նվազագույնը 5 մլն դրամ եկամուտ:
Երկրորդ, գյուղատնտեսության ՀՆԱ-ն պետք է լինի ոչ պակաս, քան 2 տրիլիոն դրամ: Երրորդ քայլով պետք է ապահովվի, որ գյուղատնտեսության ոլորտի արտահանումը կազմի տարեկան ոչ պակաս, քան 1 մլրդ դոլարը:
Չորրորդ քայլով, ըստ Քամալյանի, պետք է ապահովել ոլորտի արտադրանքի ինքնաբավությունը. այն պետք է լինի ոչ պակաս, քան 75-80 տոկոս:
«Հինգերորդ, մենք կարծում ենք, որ գյուղատնտեսությունը հնարավոր չէ զարգացնել առանց գյուղի զարգացման»,- ասաց նա:
Վեցերորդ քայլն այն է, որ կառավարությունը գտնում է, որ պետք է զարգացնել ագրոտուրիզմը, այդ նպատակով համայնքներում կկառուցվեն 10 էկո-վիլջիներ:
Յոթերորդ քայլով պետք է ֆինանսավորվի ագրարային կրթությունն ու գիտությունը:
