Երևանի կենդանաբանական այգին տեղեկացնում է, որ Արմավիրի մարզի Սարդատարապատ գյուղից արագիլները տեղափոխվել են Կենդանաբանական այգի:
Կենդանաբանական այգում ֆեյսբուքյան էջում արվել է հետևյալ գրառումը.
Օրերս Արմավիրի մարզի Սարդարապատ գյուղում արագիլի բույն էր ընկել: Բնում եղել են մայր արագիլն ու երեք ձագերը: Սարդարապատ գյուղի բնակիչներից մեկն ահազանգել է ԱԻՆ։ Ահազանգող բնակչին հայտնել են, որ օգնությունը պետք է ցուցաբերվի մասնագիտացված կառույցի կողմից՝ հավաստելով, որ այդ դեպքում նախարարության աշխատակիցները կանեն հնարավորը՝ օգտակար լինելու համար։
Արդյունքում՝ ահազանգը վերահասցեավորվել է Երևանի կենդանաբանական այգուն, որը պատասխանատվություն է ստանձնել օգնություն ցույց տալ և խնամել արագիլի ձագերին: Մոտ երկու ամսական երեք ձագերը այժմ Երևանի կենդանաբանական այգում են, ունեն առողջ տեսք, չունեն վնասվածքներ և չեն հրաժարվել կերակուրից, ինչն արդեն դրական արդյունք է: Երևանի Կենդանաբանական այգու մասնագետների գնահատականով` արագիլի ձագերը կենդանաբանական այգում կմնան, մինչև կկարողանան ինքնուրույն թռչել: