Վայոց ձորի մարզպետարանում Վայոց ձորի մարզպետ Արարատ Գրիգորյանի գլխավորությամբ երեկ կայացել է 2022 թվականի սեպտեմբերյան ագրեսիայի ընթացքում Վայոց ձորի մարզից զոհված զինծառայողներին Հայաստանի նախագահի կողմից հետմահու տրված պարգևների հանձնումը նրանց հարազատներին:
Միջոցառմանը մասնակցում էին ՀՀ ՊՆ 5-րդ բանակային կորպուսի հրամանատարը, ԱԱԾ Վայոց ձորի մարզային վարչության պետը, ՊՆ զորակոչային և զորահավաքային համալրման ծառայության Վայոց ձորի տարածքային ստորաբաժանման ղեկավարը, Վայոց ձորի մարզի համայնքների ղեկավարներ, մարզպետարանի աշխատակիցներ:
«Անհնար է բառերով նկարագրել մեր հերոսների անհավանական սխրանքները: Նրանք խիզախորեն ադրբեջանական ոտնձգություններից պաշտպանեցին մեր երկրի սահմանները: Մեր հերոսների հիշատակին արժանի լինելու համար ապրողներիս սրբազան պարտքն է շարունակել նրանց գործը՝ իրենց կյանքի գնով մեզ փոխանցած այս փխրուն խաղաղությունը վերածել կայուն խաղաղության և ամենօրյա գործունեությամբ շենացնել մեր երկիրը՝ ապահովելով գալիք սերունդների խաղաղ ու բարեկեցիկ կյանքը»,- ասել է մարզպետ Արարատ Գրիգորյանը:
Ելույթներով հանդես են եկել ՊՆ 5-րդ բանակային կորպուսի հրամանատարի տեղակալ, փոխգնդապետ Հովիկ Սարգսյանը և Վայքի բրիգադի տեղակալ, փոխգնդապետ Արման Ալոյանը:
Պարգևները զոհված զինծառայողների հարազատներին են հանձնել Վայոց ձորի մարզպետը, գնդապետ Սասուն Բադասյանը և ԶՈՒ սպառազինության վարչության պետ, գեներալ-մայոր Մհեր Շիրինյանը:
Հետմահու պարգևատրված վայոցձորցի հերոսներն են.
Նահապետ նվերի Մարգարյան – փոխգնդապետ, պարգևատրվել է «Մարտական խաչ» երկրորդ աստիճանի շքանշանով,
Հովհաննես Փայլակի Սուքիասյան – սերժանտ, պարգևատրվել է Մարտական ծառայության մեդալով,
Խաչիկ Էդվարդի Մինասյան – ենթասպա, պարգևատրվել է Մարտական ծառայության մեդալով,
Գրիգոր Վրույրի Ղարախանյան – սերժանտ, պարգևատրվել է Մարտական ծառայության մեդալով,
Զորիկ Կորjունի Մարգարյան – կրտսեր սերժանտ, պարգևատրվել է Մարտական ծառայության մեդալով,
Սամվել Սենիկի Բաբայան – պայմանագրային զինծառայող, պարգևատրվել է Մարտական ծառայության մեդալով,
Ռաֆիկ Էդիկի Ավագյան – ծառայող բանվոր, պարգևատրվել է Մարտական ծառայության մեդալով,
Նարեկ Մխիթարի Հակոբյան – սերժանտ, պարգևատրվել է Մարտական ծառայության մեդալով:
