Այսօր Երասխ է այցելել Եվրոպական միության մշտադիտարկման առաքելությունը։ Վաղը, Արտգործնախարարության հրավերով, Երասխ կայցելեն Հայաստանում հավատարմագրված միջազգային դիվանագիտական կորպուսի ներկայացուցիչներ։Այս մասին հայտնում է «Ազատություն»-ը:
«Հարցը անշուշտ կպահենք նրանց ուշադրության կենտրոնում», – խորհրդարանում հայտարարեց Արարատ Միրզոյանը։
Իրավիճակը հայ-ադրբեջանական սահմանի՝ Երասխի հատվածում երեկվանից է լարվել։ Վերջին կրակոցների մասին ՊՆ-ն մի քանի ժամ առաջ է հաղորդել, որ 13:45-ին ադրբեջանցիները տարբեր տրամաչափի հրաձգային զենքերից կրակել են Երասխի հայկական դիրքերի ուղղությամբ:
Հայաստանի ռազմական գերատեսչությունն ավելի վաղ հայտարարել է, որ ադրբեջանական զինուժը կեսօրին մոտ՝ 11:45-ի սահմաններում կրակ է բացել Երասխում կառուցվող հայ-ամերիկյան մետալուրգիական գործարանի ուղղությամբ, վիրավորվել է գործարանի շինարարության վրա աշխատող Հնդկաստանի երկու քաղաքացի։