Հայաստանի և Ադրբեջանի միջև լարվածություն հրահրող քայլերն անարդյունավետ են, մինչ կողմերի միջև շարունակվում են բանակցությունները: «Արմենպրես»-ի փոխանցմամբ՝ այս մասին հայտարարել է ԱՄՆ պետքարտուղարության խոսնակի առաջին տեղակալ Վեդանտ Պատելը՝ անդրադառնալով վերջին օրերին Հայաստանի սահմանին Ադրբեջանի կողմից իրականացված գնդակոծություններին:
«Մենք շարունակում ենք հավատալ, որ քայլերը, որոնք լարվածություն են հրահրում և ավելացնում են լարվածությունը, անշուշտ, անարդյունավետ են այս պահին, մինչ Հայաստանի և Ադրբեջանի միջև տարբեր հարթակներում բանակցություններ են ընթանում։ Եվ այսպես, մենք կշարունակենք զբաղվել դրանով և անհամբեր սպասում ենք շուտով բանակցությունների ևս մեկ փուլ հյուրընկալուն», – ասել է Պատելը՝ ևս մեկ անգամ կրկնելով, որ խնդիրները լուծելու և տևական ու արժանապատիվ խաղաղության հասնելու միակ ճանապարհն ուղիղ երկխոսությունն է:
Ինչ վերաբերում է ՌԴ ԱԳ նախարար Սերգեյ Լավրովի այն հայտարարությանը, որ Արևմուտքն անկեղծ ցանկություն չունի՝ օգնելու Հայաստանի և Ադրբեջանի միջև խաղաղ կարգավորմանը և փորձում է Ռուսաստանին դուրս մղել տարածաշրջանից, Պատելը հակառակ կարծիքին է:
«Եթե Ռուսաստանը կարծում է, որ կարող է կառուցողական դեր խաղալ այս հարցում, դա, իհարկե, ողջունելի է, բայց մենք շարունակում ենք հավատալ, որ այս բանակցություններն առաջ են շարժվում… ԱՄՆ-ն այս հարցում կարևոր գործընկեր է եղել։ Այդ հարցով զբաղվել է անձամբ պետքարտուղարը», – հայտնել է Պետքարտուղարության խոսնակի առաջին տեղակալը` դարձյալ շեշտելով, որ այս գործընթացում երկխոսությանը ոչինչ չի կարող փոխարինել:
