Սեպտեմբերի 11-ից Սննդամթերքի անվտանգության տեսչական մարմինը, Առողջապահության նախարարության «Հիվանդությունների վերահսկման ազգային կենտրոն» ՊՈԱԿ-ի և Երևանի քաղաքապետարանի «Կենդանիների խնամքի կենտրոն» ՀՈԱԿ-ի հետ համատեղ, կատաղություն հիվանդությանը նվիրված իրազեկման արշավ է սկսել Երևանի և մարզերի մի շարք դպրոցներում։
Մասնագետները եղել են Երևանի Նելսոն Ստեփանյանի անվան թիվ 71, Նաիրի Զարյանի անվան թիվ 130, Լևոն Միրիջանյանի անվան թիվ 155 և Աշոտ Նավասարդյանի անվան թիվ 196 հիմնական դպրոցներում, ներկայացրել են կատաղություն հիվանդության դեմ պայքարի հիմնական միջոցառումները, կենդանիների հետ շփման կանոնները և այլն։
Տեսչական մարմնի և մասնակից մյուս կառույցների աշխատակիցները երեխաներին հորդորել են առավել զգոն լինել կենդանիների վարքի նկատմամբ՝ նշելով, որ կատաղություն հիվանդության ժամանակ կենդանիներն ունենում են վարքային փոփոխություն՝ դառնում են անհանգիստ, ագրեսիվ։
Այս հիվանդությամբ վարակվում են ոչ միայն թափառող և վայրի կենդանիները, այլև տան պայմաններում խնամված շներն և կատուները: Մասնագետները դպրոցականներին իրազեկել են, որ տնային կենդանիներին անհրաժեշտ է պարբերաբար պատվաստել, այդ թվում՝ կատաղության հիվանդության դեմ, տարին 1 անգամ:
Հանդիպումներն ընթացել են ինտերակտիվ քննարկումների, հարց ու պատասխանի մթնոլորտում, առավել ակտիվ աշակերտները ստացել են նվերներ։ Սննդամթերքի անվտանգության տեսչական մարմինը կատաղության դեմ պայքարի մասին իրազեկման այս միջոցառումները կանցկացնի մայրաքաղաքի և մարզերի մոտ 50 դպրոցներում:
