ՀՀ շրջական միջավայրի նախարար Էրիկ Գրիգորյանը կիսվել է տեսանյութով եւ գրառում է կատարել, որն առնչվում է էլեկտրոմոբիլներին։
«2019 թվականի հուլիսի մեկից էլեկտրոմոբիլների, էլեկտրական շարժիչով մոպեդների ու մոտոցիկլների ներմուծումը և իրացումը ազատվել է ԱԱՀ-ից։
Օրենքի ընդունումից հետո ներմուծվել է 144 էլեկտրոմոբիլ` նախորդ տարվա նույն ժամանակահատվածի 1 էլեկտրոմոբիլի համեմատությամբ (ելույթիս ընթացքում թյուրիմացաբար եռամսյակ եմ նշել)։
էլեկտրական շարժիչով մոպեդների և մոտոցիկլների ներմուծումը նախորդ երեք տարիներին եղել է զրո, օրենքի ընդունումից հետո 523:
Հայաստանում արդեն բազմաթիվ վայրերում ստեղծվել են լիցքավորման կայաններ։
Էլեկտրոմոբիլները բնապահպանական խնդիրների լուծմանը զուգահեռ բարձրացնում են երկրի էներգետիկ անվտանգությունը, ապահովում արտադրված էլեկտրոէներգիայի գիշերային սպառումը և այլն։
Էլեկտրոմոբիլների արտադրման և հավաքման գործընթացը էականորեն ավելի դյուրին է ներքին այրման շարժիչով մեքենաների համեմատությամբ։
Հայաստանը իր ինժեներական, գիտական, նորարական պոտենցիալով ունակ է առաջիկա տարիներին նաև տեղում կազմակերպել էլեկտրոմոբիլների հավաքումը և արտադրությունը։
Աշխարհը այսպես թե այնպես գնում է ներքին այրման շարժիչով մեքենաների փոխարինմանը էլեկտրոմոբիլներով և կարևոր է հասկանալ, թե ո՞ր շարքում ենք ցանկանում լինել՝ սպառողների թե արտադրողների»։
