Մեթյու Բրայզայի նշանակման հարցում ոչ մի խոչընդոտ չկա՞

Մեթյու Բրայզայի նշանակման հարցում ոչ մի խոչընդոտ չկա՞
Մեթյու Բրայզայի նշանակման հարցում ոչ մի խոչընդոտ չկա՞

Օրերս Բաքվում լրագրողների հետ հանդիպման ժամանակ Ադրբեջանում ԱՄՆ դեսպանատան հասարակայնության հետ կապերի բաժնի ղեկավար Թերի Դեւիդսոնը հայտարարել է, թե Սպիտակ տան եւ Պետդեպարտամենտի կողմից ոչ մի խոչընդոտ չկա` Ադրբեջանում Միացյալ Նահանգների դեսպանի պաշտոնում Մեթյու Բրայզայի նշանակման հարցում:

«Այժմ Մեթյու Բրայզայի թեկնածությունը քննարկվում է ԱՄՆ-ի Սենատում, եւ միակ բանը, ինչ մենք կարող ենք անել` դա սպասելն է», – ըստ ադրբեջանական «Թրենդ» լրատվական գործակալության, ասել է Դեւիդսոնը:

Դեւիդսոնը հայտարարել է նաեւ, թե Սենատի` ԱՄՆ-ի իշխանության անկախ մարմնի իրավասությունների շրջանակում է տեղի ունենում դեսպանի նշանակումը, եւ ըստ նրա, «Ադրբեջանում դեսպանի նշանակման այլ ճանապարհ չկա»:

Մի  քանի օր առաջ Ադրբեջանում ԱՄՆ-ի դեսպանի պաշտոնում` ԵԱՀԿ-ի Մինսկի խմբի նախկին համանախագահ Մեթյու Բրայզայի նշանակումը կասեցվել է. Բրայզայի թեկնածությունը Սենատում արգելափակել են հայամետ սենատորներ Բարբարա Բոքսերը եւ Ռոբերտ Մենենդեսը:

 

© Medialab.am