Հեռուստատեսության եւ ռադիոյի ազգային հանձնաժողովը (ՀՌԱՀ) հինգշաբթի օրը հրապարակած թվային հեռարձակման ցանցի միջոցով հեռուստածրագրերի եթերային հեռարձակում իրականացնելու մրցույթի արդյունքներով կրկին եթեր չտրամադրեց «Ա1+» հեռուստաընկերությանը:
«Ա1+»-ը պարտվեց «Արմնյուզ» հեռուստաընկերությանը, ով եւս պայքարում էր այն նույն հաճախականության համար, ինչ , «Ա1+»-ը: Մրցույթում հաղթեց «Արմնյուզը»՝ հավաքելով 44 միավոր։
Մինչդեռ հանձնաժողովի 8 անդամներից 7-ը «Ա1+»-ի ներկայացրած փաթեթին 0 միավորներ նշանակեցին։ «Ա1+»-ին 2 միավոր տվեց միայն Արա Թադևոսյանը`«Մեդիամաքսի» տնօրենը:
Հանձնաժողովի հրապարակած արդյունքներից հայտնի դարձավ նաեւ, որ նույն հաճախականության համար պայքարող ԱԼՄ հեռուստաընկերությունը պարտվել է «Երեւան» հեռուստաընկերությանը:
Հուլիսին ՀՌԱՀ-ի հայտարարած լիցենզավորման մրցույթին ներկայացված 18 հաճախություններից միայն այս 2-ի դեպքում կար մրցակցություն: Մյուս հեռուստաընկերությունները մրցակիցներ չունեին:
© Medialab.am