Այսօր, ինչպես եւ նախատեսվում էր, Ազատության հրապարակում հացադուլի նստած Րաֆֆի Հովհաննիսյանի համար վերջապես հաջողվել է փոքրիկ վրան տեղադրել:
Հիշեցնենք, որ «Ժառանգություն» կուսակցության հիմնադիր նախագահ Րաֆֆի Հովհաննիսյանը հրապարակում արդեն 9-րդ օրն է ինչ հացադուլ է հայտարարել` անվանելով այն «Ծոմ ազատության»:
Անձրեւի, արեւի տակ եռագույնի ներքո հացադուլի նստած Րաֆֆի Հովհաննիսյանը, որը տասնհինգ կետից բաղկացած պահանջագիր է ներկայացրել` ներառյալ նախագահի հրաժարականը, ոստիկաններն արգելել էին նույնիսկ հովանոց տեղադրել:
Երեկ, մի շարք ՀԿ-ներ եւ քաղաքացիներ Սերժ Սարգսյանից պահանջել էին կատարել հացադուլի մեջ գտնվողի հանդեպ պարտավորությունը եւ ապահովել վրանի տեղադրումը:
Այդ մասին խոսել է նաեւ նորանշանակ ՄԻՊ Կարեն Անդրեասյանը` կոչ անելով ՀՀ ոստիկանությանը թույլատրել վրանի կամ հովանոցի տեղադրումը: Նա նշել է, որ անձի կողմից մեկ վրանի տեղադրումը որպես ոչ զանգվածային հրապարակային միջոցառմանը ուղեկցող գործողություն` ինքնին չի կարող որակվել որպես հասարակական կարգի խախտում:
«Այս եզրակացությունը բխում է Մարդու իրավունքների եվրոպական կոնվենցիայով սահմանված` վտանգի տակ գտնվող անձի կյանքի պաշտպանության համար գործնական կանխարգելիչ միջոցներ կիրառելու պետության պոզիտիվ պարտավորության բովանդակությունից, առողջության պահպանման իրավունքի ապահովման` պետության համապատասխան պոզիտիվ պարտավորություններից, ինչպես նաև այն հանգամանքից, որ ՀՀ օրենսդրության մեջ բացակայում է հրապարակային միջոցառում իրականացնելիս վրաններ կամ այլ ժամանակավոր կառույցներ տեղադրելու վերաբերյալ արգելքի մասին դրույթը»,- հայտարարել է Կարեն Անդրեասյանը:
© Medialab.am