Սլովակիան լիովին սատարում է Լեռնային Ղարաբաղի հակամարտության կարգավորման՝ ԵԱՀԿ Մինսկի խմբի համանախագահության հովանու ներքո ընթացող գործընթացին: «Արմենպրես»-ի փոխանցմամբ՝ այս մասին փետրվարի 24-ին ՀՀ արտաքին գործերի նախարար Զոհրաբ Մնացականյանի հետ համատեղ ասուլիսի ընթացքում ասաց Սլովակիայի արտաքին և եվրոպական գործերի նախարար Միրոսլավ Լայչակը:
«Հայաստանի և Ադրբեջանի արտաքին գործերի նախարարները հունվարի վերջին Ժնևում հանդիպեցին, վարչապետ Փաշինյանն ու նախագահ Ալիևը հանդիպեցին անցյալ շաբաթ՝ Մյունխենում: Սրանք մեր տեսանկյունից դրական զարգացումներ են, որովհետև շատ կարևոր է, որ երկու արտգործնախարարները, վարչապետն ու նախագահը հանդիպեն և քննարկեն, թե ինչպես առաջ տանել հարցի լուծումը: Սլովակիան, անշուշտ, լիարժեք սատարում է այս խնդրի կարգավորման գործընթացը, որն առաջնորդում են ԵԱՀԿ Մինսկի խմբի համանախագահները: Մենք վստահում ենք նրանց աշխատանքին, շատ սերտորեն համագործակցել ենք նրանց հետ անցյալ տարվա ընթացքում՝ որպես ԵԱՀԿ-ում նախագահող երկիր»,- ասաց Լայչակը:
Սլովակիայի արտաքին և եվրոպական գործերի նախարար Միրոսլավ Լայչակը Հայաստանում է պաշտոնական այցով:
