«Դատախազները առանցքային դեր են խաղում արդարադատության իրականացման եւ արդար դատավարության ապահովման գործում: Հուսով ենք, որ այս նախաձեռնությունը կխթանի քրեական արդարադատության բարեփոխումները ու կամրապնդի հանրապետությունում մարդու իրավունքների պաշտպանությունը»,- այսօր հայտարարել է ԵԱՀԿ երեւանյան գրասենյակի ղեկավար, դեսպան Սերգեյ Կապինոսը` ՀՀ Գլխավոր դատախազ Աղվան Հովսեփյանի հետ Հայաստանում դատախազության համակարգի բարեփոխումների ոլորտում համագործակցության համաձայնագրի ստորագրումից հետո:
Ինչպես տեղեկացնում են ԵԱՀԿ երեւանյան գրասենյակից, համաձայնագրով` փոխըմբռնման հուշագրով ԵԱՀԿ-ն կաջակցի դատախազությանը համապատասխան օրենսդրությունը եւ դրա իրականացումը միջազգային չափանիշներին լիարժեք համապատասխանեցնելու, ինչպես նաև դատախազության աշխատակիցների կարողությունները զարգացնելու հարցում:
Հուշագրով նաև նախատեսվում է բարեփոխումների գործընթացի անկախ գնահատում` առաջարկություններով եւ հետագա քայլեր դատախազության աշխատանքների արդյունավետությունն ու թափանցիկությունը բարձրացնելու ուղղությամբ:
Իր հերթին Աղվան Հովսեփյանը հայտարարել է, թե Հայաստանի դատախազության համակարգը երեք անգամ ենթարկվել է բարեփոխումների:
«Վերջին բարեփոխման հիմքը դրվել է 2007 թվականին ընդունված «Դատախազության մասին» ՀՀ օրենքով, որի կիրառման ընթացքում արդեն իսկ ի հայտ են եկել որոշ խնդիրներ, բացթողումներ, որոնք պահանջում են օրենսդրական լուծումներ: Միջազգային փորձագետից ակնկալվում է ոչ միայն մասնագիտական կարծիք՝ կատարված բարեփոխումների վերաբերյալ, այլ նաեւ խորհրդատվություն՝ միջազգային փորձի հիման վրա օրենսդրական դաշտը կատարելագործելու, բարեփոխումները շարունակելու համար»,- հայտարարել է ՀՀ գլխավոր դատախազը:
ԵԱՀԿ երեւանյան գրասենյակից նաեւ տեղեկացնում են, որ որպես առաջին քայլ` ԵԱՀԿ միջազգային փորձագետը կպատրաստի դատախազության դերի եւ գործառույթների վերլուծություն: Փորձագետը հաշվի կառնի եվրոպական համապատասխան չափանիշները եւ ԵԱՀԿ տարածաշրջանի լավագույն փորձը ու առաջարկություններ կկատարի, թե որ ոլորտների վրա պետք է ծրագիրը կենտրոնացած լինի:
© Medialab.am