«Հայկական ժամանակ» օրաթերթի 27.08.11թ. համարում «Ամենաբարձր վարձատրվող պետական պաշտոնյաները» խորագրով հրապարակման մեջ ՀՀ գլխավոր դատախազի աշխատավարձի մասին նշված տեղեկատվությունը չի համապատասխանում իրականությանը: Այս մասին տեղեկացնում է ՀՀ դատախազության պաշտոնական հաղորդագրությունը:
«Գործող օրենսդրությամբ՝ ՀՀ գլխավոր դատախազի պաշտոնային դրույքաչափը կազմում է 392.000 դրամ, իսկ գլխավոր դատախազի տեղակալի պաշտոնային դրույքաչափը՝ 333.200 դրամ, որին գումարվում է աշխատանքային ստաժի հավելավճարը: Դասային աստիճանների համար դատախազները հավելավճարներ չեն ստանում»,-նշված է հաղորդագրության մեջ, ըստ որի 2008 թվականից առ այսօր ՀՀ պետական բյուջեով համապատասխան ֆինանսավորում չի հատկացվում:
Դատախազությունը տեղեկացնում է , որ ՀՀ գլխավոր դատախազի եւ տեղակալների աշխատավարձերը ամսական կազմում են՝
ՀՀ գլխավոր դատախազ Ա.Հովսեփյան – 784.000 դրամ
ՀՀ գլխավոր դատախազի տեղակալ Ա.Թամազյան – 666.400 դրամ
ՀՀ գլխավոր դատախազի տեղակալ Մ.Սարգսյան – 609.168 դրամ
ՀՀ գլխավոր դատախազի տեղակալ Ա.Դանիելյան – 368.480 դրամ
ՀՀ գլխավոր դատախազի տեղակալ Գ.Կոստանյան – 333.200 դրամ
Հիշեցնենք, որ «Հայկական ժամանակ» օրաթերթի հրապարակման համաձայն, ՀՀ գլխավոր դատախազ Աղվան Հովսեփյանի աշխատավարձի չափը` 1 մլն 176 հազար դրամ է:
© Medialab.am