ԱԺ Պաշտպանության, ներքին գործերի եւ ազգային անվտանգության մշտական հանձնաժողովի նախագահ Հրայր Կարապետյանը այսօր լրագրողների հետ հանդիպման ժամանակ հայտարարել է, թե Հայաստանի բանակում դեռեւս մնացել է խորհրդային բանակի հետքը:
Նա հիշեցրել է, որ ամենաշատ հանցագործությունները լինում են ռուսական բանակում, հետո` նաեւ նախկին խորհրդային երկրների բանակներում:
«Հրամանատարները որոնք չեն համապատասխանում իրենց կոչմանը, անկախ նրանց ծառայություններից, մեր բանակում տեղ չունեն: Մեկ օրում մեկ տարում հնարավոր չէ բոլոր խնդիրները լուծել, բայց պետք է շատ արագ լուծենք»,- նշել է Կարապետյանը:
Կարապետյանը նշել է, թե պետք է օրենսդրորեն ամրագրել սպաների եւ զինվորների իրավունքներն ու պարտականությունները, ինչպես նաեւ արմատապես փոխել զորակոչի կարգը:
«Զինծառայողների արձակուրդ գնալու խնդիրը պետք է կանոնակարգվի, որ ոչ թե հրամանատարը բարեհաճի արձակուրդ ուղարկել, այլ օրենքով լինի: Որքան օրենքները գործեն բանակում, այնքան կբացառվեն ցավալի դեպքերը»,- ասել է Կարապետյանը:
© Medialab.am