Վաղվանից Ճանապարհային ոստիկանության հետ համատեղ անցկացվելու է մոնիտորինգ, որին պետք է մասնակցեն Երեւանի քաղաքապետարանի ու վարչական շրջանների աշխատակազմերի բոլոր աշխատակիցները` երթեւեկելով բացառապես հասարակական տրանսպորտով:
Այդ մասին որոշում է կայացվել այսօր` Երեւանի քաղաքապետարանում տեղի ունեցած հերթական աշխատանքային խորհրդակցության ընթացքում, որը վարել է Երեւանի քաղաքապետի առաջին տեղակալ Տարոն Մարգարյանը:
Ինչպես տեղեկացնում են քաղաքապետարանից, մոնիթորինգն անց է կացվելու քաղաքային տրանսպորտի տեխնիկական եւ քանակական վիճակին, սպասարկման որակին, ինչպես նաեւ մայրաքաղաք մտնող մերձքաղաքային ավտոտրանսպորտային միջոցները հատկացված վերջնակետային հանգույցներում կանգառելու վերաբերյալ որոշման հսկողության նպատակով:
Տարոն Մարգարյանը նաեւ հավելել է, որ առանձին մոնիտորինգներ պետք է անցկացվեն նաեւ քաղաքացիների շրջանում` լսելով նրանց կարծիքներն ու առաջարկությունները, իսկ մոնիտորինգների արդյունքները կամփոփվեն մինչեւ աշխատանքային շաբաթվա ավարտը:
Փոխքաղաքապետը հանձնարարել է նաեւ հսկողություն սահմանել ստորգետնյա անցումների եւ քաղաքային շուկաների սանհանգույցների սանիտարահիգիենիկ վիճակի ապահովման ուղղությամբ:
Մարգարյանը նաեւ անդրադարձել է թափառող շների հարցին եւ հանձնարարել, որ, «Յունիգրաֆ Իքս» ընկերության հետ համատեղ, միջոցառումներ ձեռնարկվեն խնդիրը լուծելու ուղղությամբ:
© Medialab.am
