«Բանակն իրականում». Լալա Ասլիկյանին տեղափոխել են ոստիկանության կենտրոնական բաժին

«Բանակն իրականում». Լալա Ասլիկյանին տեղափոխել են ոստիկանության կենտրոնական բաժին
«Բանակն իրականում». Լալա Ասլիկյանին տեղափոխել են ոստիկանության կենտրոնական բաժին
Հեղինակ MediaLab

2011թ. հոկտեմբերի 27-ին ՀՀ կառավարության շենքի մոտ պետք է տեղի ունենար Հայաստանի զինված ուժերում մահացած զինծառայողների ծնողների և “Բանակն իրականում” նախաձեռնող խմբի հերթական ակցիան` զինծառայողների սպանությունները բացահայտելու և գործերի քննությունը պատշաճ կերպով վարելու պահանջով: Ոստիկանները թույլ չեն տվել, որպեսզի ակցիան կայանա նախատեսված վայրում և բռնություն են կիրառել զինծառայողների ծնողների նկատմամբ` հրմշտելով նրանց և խոչընդոտելով խաղաղ հավաքի անցկացումը:

Ակցիայի մասնակիցներն արձագանքել են` արտահայտելով իրենց վերաբերմունքը ոստիկանների բռնությունների նկատմամբ: Ոստիկանները, բռնի ուժ կիրառելով ցուցարարներից մեկի` “Բանակն իրականում” քաղաքացիական նախաձեռնության անդամ Լալա Ասլիկյանի նկատմամբ, նրան տեղափոխել են ՀՀ ոստիկանության Երևան քաղաքի վարչության կենտրոնական բաժին: ՀՀ ոստիկանության Երևան քաղաքի վարչության կենտրոնական բաժնի մոտ, որտեղ հավաքվել են մի խումբ քաղաքացիներ` պահանջելու ազատել Լալա Ասլիկյանին, կրկին տեղի է ունեցել միջադեպ. ՀՀ ոստիկանության Երևան քաղաքի վարչության կենտրոնական բաժնի փոխոստիկանապետ Արայիկ Պետրոսյանը փորձ է արել մեքենայով վրաերթ կատարել ցուցարարների ուղղությամբ և հարվածել ԱԺ պատգամավոր Զարուհի Փոստանջյանին:

Արդեն կես ժամից ավել է Լալա Ասլիկյանի փաստաբան Ռոբերտ Ռևազյանը կանգնած է ՀՀ ոստիկանության Երևան քաղաքի վարչության կենտրոնական բաժնի մուտքի մոտ և նրան թույլ չեն տալիս մուտք գործել ոստիկանության բաժին: Մոտ 20 ոստիկան կանգնած են ոստիկանության բաժնի մուտքի մոտ, իսկ 30-ը ավելի հեռու` խոչընդոտելով ցուցարարներին մոտենալ ոստիականության բաժնի շենքին:

Medialab.am