ԱԺ-ն առաջին ընթերցմամբ ընդունեց կոնտակտավորներին գտնելու համար զանգերը ֆիքսելու օրինագիծը

Հեղինակ MediaLab

ՀՀ ազգային ժողովն առաջին ընթերցմամբ ընդունեց կառավարության կողմից ներկայացված օրենքների նախագծերի փաթեթը, որով համաճարակի հետևանքով առաջացած արտակարգ դրության ժամանակ մարդկանց անձնական տվյալների պաշտպանության, մասնավոր և ընտանեկան կյանքի անձեռնմխելիության, հաղորդակցության ազատության, գաղտնիության իրավունքներին միջամտություն իրականացնելու հնարավորություն է տրվում:

«Արմենպրես»-ի փոխանցմամբ՝ «Արտակարգ դրության իրավական ռեժիմի մասին» օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթը ԱԺ մարտի 30-ի արտահերթ նիստում ստացավ 57 կողմ, 24 դեմ և 1 ձեռնպահ ձայներ:

Առաջարկվում է նախատեսել, որ արտակարգ դրության ժամանակ, եթե արտակարգ դրությունը համարաճարակի հետևանքով առաջացած արտակարգ իրավիճակով է պայամանավորված, կարող է միջամտություն իրականացվել նաև անձնական տվյալների պաշտպանության, մասնավոր և ընտանեկան կյանքի անձեռնմխելիության, հաղորդակցության ազատության, գաղտնիության իրավունքներին:

ՀՀ արդարադատության նախարար Ռուստամ Բադասյանը նախագիծը ներկայացնելիս անդրադառնալով նրան, թե ինչ տեղեկություններ են հավաքվելու, նշել էր՝ մասնավորապես հանրային էլեկտրոնային հաղորդակցության ծառայություններ ստացող հաճախորդների կողմից օգտագործված ծառայության վայրը պարզելու համար անհրաժեշտ տվյալներ կամ, այլ կերպ ասած, հաճախորդի տեղորոշումը: Հաճախորդի հեռախոսահամարի հետ ուղիղ կամ անուղղակի (միջնորդավորված) կապ ունեցած հեռախոսահամարները, հեռախոսային խոսակցությունն սկսելու ամսաթիվը, սկիզբը եւ ավարտը պարզելու համար անհրաժեշտ տվյալներ, իսկ հեռախոսային զանգի վերահասցեագրման կամ փոխանցման դեպքում, այն հեռախոսահամարի վերաբերյալ տվյալներ, որին փոխանցվել է զանգը:

Նույն համակարգում ամփոփվելու են նաև բժշկական գաղտնիք համարվող տեղեկություններ՝ անձանց վարակումը ստուգելու նպատակով հավաքագրված տվյալների, անձի հետազոտություն անցելու մասին տվյալների մասին:Փաթեթով մասնավորապես առաջարկվում է կորոնավիրուսով վարակված անձանց կոնտակտավորներին հայտնաբերելու համար այդ անձի հետ հեռախոսով շփված անձանց շրջանակը բացահայտելու մեխանիզմ ներդնել:

Քվեարկությունից առաջ «Իմ քայլը» խմբակցության ղեկավար Լիլիթ Մակունցը հիշեցրեց, որ նախագիծը չի ենթադրում որևէ բովանդակային վերահսկողություն՝ թե հեռախոսազանգերի, թե հաղորդագրությունների բովանդակության, այլ պարզապես փաստում է, որ տեղի է ունեցել զանգ կամ հաղորդագրություն՝ այս կամ այն համարին: «Իմ քայլը» խմբակցությունն առաջարկներ ունի կառավարությանը, որոնք կներկայացնի կառավարությանը: Առաջարկները մասնավորապես վերաբերվում են տվյալների ոչնչացմանը:

Նա հայտնեց, որ խմբակցությունն առաջին ընթերցմամբ քննարկմանը կողմ քվեարկի: Անկախ պատգամավոր Արման Բաբաջանյանը նշեց, որ նախագիծը քննարկել է ՄԻՊ-ի հետ, որը շատ լուրջ վերապահումներ ու անհամաձայնություններ ունի նախագծի վերաբերյալ: Պատգամավորը հայտնեց, որ դեմ է քվեարկելու: Ավելի վաղ ԲՀԿ-ն ու ԼՀԿ-ն ևս հայտնել էին, որ դեմ են քվեարկելու: