Չնայած բժիշկների հոգածությանը և պարբերական զննումներին` հնարավոր չի եղել փրկել Երևանի կենդանաբանական այգու տարեց բնակիչներից մեկի` Ռոստիկ ընձառյուծի կյանքը (Panthera onca):
2001-ից Ռոստովի կենդանաբանական այգուց Երևան տեղափոխված ընձառյուծի մոտ, ըստ կենդանաբանական այգու գիշատիչների բաժնի վարիչ Յունոնա Խանզադյանի, վերջին չորս տարիներին լուրջ առողջական խնդիրներ էին ի հայտ եկել:
«Ռոստիկը ստամոքսի լուրջ խնդիրներ ուներ, որի պատճառով վիճակը ժամանակ առ ժամանակ վատանում էր, և կենդանին օրեր շարունակ հրաժարվում էր սննդից»,-ասում է Խանզադյանը:
Հաշվի առնելով ընձառյուծի քրոնիկական առողջական խնդիրները` կենդանին վերջին տարվա ընթացքում եղել է անասնաբույժի մշտական հսկողության ներքո: Անցյալ տարի Երևանում գտնվելու ընթացքում նրան զննել է նաև Ամստերդամի կենդանաբանական այգու անասնաբույժ Մարկ Հոյերը: Նրա հետազոտությունները ևս հաստատել էին ստամոքսի խնդիրները, որից հետո ընձառյուծին բուժում էր նշանակվել:
«Բուժումն օգնել էր, բայց մեկ շաբաթ առաջ կենդանու վիճակը կրկին վատացավ»,- ասում է այգու անասնաբույժ Հարություն Հովհաննիսյանը:
«Ընձառյուծի մոտ ի հայտ եկած առողջական խնդիրները խոր քրոնիկական բնույթի էին: 4 տարի կենդանին լուրջ խնդիրներ ուներ, դրան գումարած նաև կենդանու տարիքը, որը խոչընդոտում էր բուժման արդյունավետությանը»,- ասում է Հ. Հովհաննիսյանը:
Ընձառյուծների կյանքի տևողությունը սովորաբար 12-20 տարի է: Ռոստիկը 13 տարեկան էր:
© Medialab.am
